നാദാപുരം തൂണേരിയിൽ മാത്രം 53 പേർക്ക് കൊവിഡ്; പഞ്ചായത്ത് പ്രസിഡന്‍റിനും വാര്‍ഡ് അംഗങ്ങള്‍ക്കും രോഗം; നിയന്ത്രണങ്ങള്‍ ശക്തം

കോഴിക്കോട് നാദാപുരം തൂണേരിയിൽ നിരവധി പേർക്ക് കൊവിഡ് സ്ഥിരീകരിച്ചതോടെ സ്ഥിതി ​ഗുരുതരം. തൂണേരിയിൽ ഇന്നലെ 400 പേരുടെ സ്രവം പരിശോധിച്ചതിൽ 53 പേർക്കാണ് കൊവിഡ് സ്ഥിരീകരിച്ചത്. പഞ്ചായത്തിലെ പ്രതിരോധ പ്രവർത്തനങ്ങളിൽ മുന്നിലുണ്ടായിരുന്ന പഞ്ചായത്ത് പ്രസിഡന്റ് കെപിസി തങ്ങൾ കോയ അടക്കം രണ്ട് പഞ്ചായത്ത് അം​ഗങ്ങളും ഇതിൽ ഉൾപ്പെടുന്നു. ഇതെതുടർന്ന് പഞ്ചായത്ത് ഓഫിസ് അടച്ചു. ഇവരുടെ കുടുംബാം​ഗങ്ങൾ നിരീക്ഷണത്തിലാണ്.

പഞ്ചായത്തിലെ എല്ലാവർക്കും കൊവി‍ഡ് പരിശോധന നടത്തുമെന്നാണ് വിവരം. പ്രദേശത്ത് കർശന നിയന്ത്രണങ്ങളാണ് ഏർപ്പെടുത്തിയത്. നേരത്തെ പഞ്ചായത്തിൽ കൊവിഡ് സ്ഥിരീകരിച്ച രണ്ടുപേരുടെ സമ്പർക്കത്തിൽ ഉണ്ടായിരുന്നവർക്കാണ് ആന്റിജൻ പരിശോധന നടത്തിയതും ഇത്രയധികം കേസുകൾ റിപ്പോർട്ട് ചെയ്തതും.

Also Read: 24 മണിക്കൂറില്‍ 28,498 പേര്‍ക്ക് കൊവിഡ്, മരണം 553; രാജ്യത്ത് ഒന്‍പത് ലക്ഷത്തിലേറെ രോഗികള്‍, മരണം 24,000ത്തിലേക്ക്

നാദാപുരം പുളിക്കൂൽ റോഡിൽ കഴിഞ്ഞ ദിവസം ഗൃഹപ്രവേശം നടന്ന വീട്ടിലെ ​ഗൃഹനാഥൻ, ഇദ്ദേഹം വ്യാപാരി കൂടിയാണ്, പഞ്ചായത്തിലെ വനിതാ മെംബർ എന്നിങ്ങനെ നിരവധി പേരുടെ പരിശോധന ഫലങ്ങളാണ് പോസിറ്റീവായത്. ഇവരുമായി നിരവധി പേർ സമ്പർക്കത്തിൽ ഏർപ്പെട്ടിട്ടുളളതായാണ് വിവരം. ഇവരുടെയെല്ലാം സ്രവം പരിശോധനയ്ക്ക് എടുക്കാനുള്ള തീരുമാനത്തിലാണ് ആരോ​ഗ്യവകുപ്പ്. ജനം പുറത്തിറങ്ങുന്നത് തടയാൻ പൊലീസ് കർശന നടപടി തുടങ്ങി. പ്രധാന റോഡുകൾ അടക്കം അടച്ചു. ടൗണുകളിൽ പരിശോധന ശക്തമാക്കിയിട്ടുണ്ട്.

Also Read: 'പഴയ സാധാരണ ജീവിതത്തിലേക്ക് ലോകം മടങ്ങിവരില്ല', കൊവിഡ് വ്യാപനം കൂടുതല്‍ മോശമാകുന്നുവെന്ന് ഡബ്ല്യുഎച്ച്ഒ

നാലു ജില്ലകളില്‍ അതീവജാഗ്രത പുലര്‍ത്താനാണ് ആരോഗ്യവകുപ്പ് നിർദേശം നൽകിയത്. ആലപ്പുഴ, കണ്ണൂര്‍, പാലക്കാട്, തൃശൂര്‍ ജില്ലകളില്‍ കൂടുതല്‍ ക്ലസ്റ്ററുകള്‍ രൂപപ്പെടാന്‍ സാധ്യതയുണ്ടെന്നാണ് ആരോഗ്യവകുപ്പിന്റെ മുന്നറിയിപ്പ്. ഈ പ്രദേശങ്ങളില്‍ പ്രത്യേക ശ്രദ്ധ വേണം. ഇതുവരെ സംസ്ഥാനത്ത് 51 ക്ലസ്റ്ററുകളാണ് രൂപപ്പെട്ടത്. ഇതിൽ തിരുവനന്തപുരം പൂന്തുറ, മലപ്പുറം പൊന്നാനി എന്നിവയാണ് വലിയ ക്ലസ്റ്ററുകൾ.