നടിയെ ആക്രമിച്ച കേസ്: വിചാരണക്കോടതി കീഴ്വഴക്കം ലംഘിച്ചു, പ്രോസിക്യൂഷന് പല രേഖകളും നൽകുന്നില്ലായെന്ന് സംസ്ഥാന സർക്കാർ

നടിയെ തട്ടിക്കൊണ്ട് പോയി ലൈംഗികമായി ആക്രമിച്ച കേസിൽ വിചാരണക്കോടതി‌ക്കെതിരെ സംസ്ഥാന സർക്കാർ. വിചാരണക്കോടതി പക്ഷപാതപരമായി പെരുമാറിയെന്നും  കീഴ്വഴക്കം ലംഘിച്ചതായും സർക്കാർ ഹൈക്കോടതിയിൽ അറിയിച്ചു. കേസിൽ വിചാരണ മറ്റൊരു കോടതിയിലേക്ക് മാറ്റണമെന്നു ആവശ്യപ്പെട്ടു  ആക്രമിക്കപ്പെട്ട നടി നൽകിയ ഹർജി പരിഗണിക്കവേയാണ് സംസ്ഥാന സർക്കാർ ഇക്കാര്യം വ്യക്തമാക്കിയത്. വിചാരണക്കോടതി പക്ഷപാതപരമായി പെരുമാറുന്നുവെന്ന പ്രോസിക്യൂഷൻ്റെ അടക്കം ആരോപണങ്ങൾ ചൂണ്ടിക്കാട്ടിയായിരുന്നു നടി ഹർജി സമർപ്പിച്ചത്. 

കേസിലെ പല രേഖകളും വിചാരണക്കോടതി പ്രോസിക്യൂഷന് നൽകിയിരുന്നില്ലെന്നും സർക്കാർ അറിയിച്ചു. അതേ സമയം, രേഖകൾ പ്രതിഭാഗത്തിന് നൽകിയിരുന്നതായും സർക്കാർ കോടതിയിൽ ചൂണ്ടിക്കാട്ടി. ആക്രമിക്കപ്പെട്ട നടിയുടെ രഹസ്യ വിചാരണയുടെ സമയത്ത് ഇരുപത് അഭിഭാഷകർ കോടതിയിൽ ഉണ്ടായിരുന്നതായും പ്രതിഭാഗം അഭിഭാഷകരുടെ അതിരുവിട്ട ചോദ്യം തടയാൻ വിചാരണക്കോടതി ശ്രമിച്ചില്ലെന്നും സർക്കാർ വ്യക്തമാക്കി. വിചാരണ നിർത്തിവെക്കണമെന്നു പ്രോസിക്യൂഷൻ ആവശ്യപ്പെട്ടപ്പോൾ  കീഴ്വഴക്കം ലംഘിച്ചു കോടതി തന്നെ തീരുമാനമെടുത്തതായും സർക്കാർ ഹൈക്കോടതിയിൽ പറഞ്ഞു.

ഹർജി തിങ്കളാഴ്ച്ച കോടതി വീണ്ടും പരിഗണിക്കും. വിശദമായ സത്യവാങ്മൂലം സമർപ്പിക്കാൻ ഹൈക്കോടതി സർക്കാരിനോട് ആവശ്യപ്പെട്ടിട്ടുണ്ട്.

വിചാരണക്കോടതിയിൽ നിന്ന് നീതി ലഭിക്കുമെന്ന് കരുതുന്നില്ലെന്ന് നേരത്തെ സ്പെഷ്യൽ പബ്ലിക് പ്രോസിക്യൂട്ടറായ എം സുരേശൻ വ്യക്തമാക്കിയിരുന്നു. വിചാരണക്കോടതി ജഡ്ഡ് ഹണി എം വർഗീസിനെതിരെ ​ഗുരുതരമായ ആരോപണങ്ങളാണ് സ്പെഷ്യൽ പബ്ലിക് പ്രോസിക്യൂട്ടർ ഉന്നയിച്ചിരുന്നത്. വിചാരണ മറ്റൊരു കോടതിയിലേക്ക് മാറ്റണമെന്ന് ആവശ്യപ്പെട്ട് സ്പെഷ്യൽ പബ്ലിക് പ്രോസിക്യൂട്ടറും നേരത്തെ ഹൈക്കോടതി രജിസ്ട്രാർക്ക് പരാതി നൽകിയിരുന്നു.

കേസിൽ ഇതുവരെ 182 സാക്ഷികളെയാണ് വിസ്തരിച്ചത്. താരങ്ങളും അമ്മയുടെ ഭാരവാഹികളുമായ ഇടവേള ബാബു, സിദ്ദീഖ് എന്നിവരും നടിമാരായ ബിന്ദു പണിക്കർ, ഭാമ എന്നിവരും കേസിൽ കൂറുമാറിയിരുന്നു. കഴിഞ്ഞതവണയും സാക്ഷി വിസ്താരത്തിന് പ്രോസിക്യൂഷൻ ഹാജരാകാത്തതിനെ തുടർന്ന് കേസിന്റെ വിചാരണ അനിശ്ചിതമായി നീണ്ടിരുന്നു.