രോഗമുക്ത; കൊവിഡ് ഫലം നെഗറ്റീവായത് ട്വീറ്റിലൂടെ അറിയിച്ച് നടി സുമലത

നടിയും കർണാടകയിലെ മാണ്ഡ്യയിൽ നിന്നുള്ള ലോക്സഭാംഗവുമായ സുമലത  താൻ കൊവിഡ് നെഗറ്റീവായ വിവരം ട്വിറ്ററിലൂടെ അറിയിച്ചു. നിലവിൽ ടെസ്റ്റ് ഫലം നെഗറ്റീവായെങ്കിലും താൻ ക്വാറന്റൈനിൽ തുടരുമെന്ന് സുമലത വ്യക്തമാക്കി. ഡോക്ടർമാരുടെ നിർദേശ പ്രകാരമാണ്  ഒരാഴ്ച കൂടെ  വീട്ടിൽ തന്നെ ക്വാറന്റൈനിൽ കഴിയാൻ തീരുമാനിച്ചതെന്ന് സുമലത വ്യക്തമാക്കി.

കഴിഞ്ഞ ജൂലൈ നാലിനാണ് തലവേദനയും തൊണ്ടവേദനയും  തുടർന്ന് സുമലത ഡോക്ടറെ സമീപിച്ചത്. തുടർന്ന് സ്രവം പരിശോധനയ്ക്ക് അയയ്ക്കുകയും കൊവിഡ് സ്ഥിരീകരിക്കുകയുമായിരുന്നു. കൊവിഡ് സ്ഥിതീകരിക്കുന്നതിന്  ഒരാഴ്ച മുൻപ് ജൂൺ 29ന് കർണാടക മുഖ്യമന്ത്രി യെദ്യൂരപ്പയുമായി സുമലത  കൂടിക്കാഴ്ച നടത്തിയിരുന്നു.

സുമലത എന്ന പേര് കേള്‍ക്കുമ്പോള്‍ മലയാളികള്‍ ആദ്യം ഓര്‍ക്കുക ക്ലാരയെ ആയിരിക്കും. സുമലതയുടെ എക്കാലത്തെയും മികച്ച സ്ത്രീകഥാപാത്രങ്ങളിലൊന്നായിരുന്നു ക്ലാര.പത്മരാജൻ ചിത്രമായ 'തൂവാനത്തുമ്പികൾ' എന്ന ചിത്രത്തിൽ സുമലത അനശ്വരമാക്കിയ കഥാപാത്രമായിരുന്നു ക്ലാര. ഒരു കാലത്ത് മലയാളം, കന്നഡ, തമിഴ്, തെലുങ്ക്, ഹിന്ദി എന്നീ ഭാഷകളിലെ തിരക്കുള്ള നായികമാരിലൊരാളായിരുന്നു സുമലത. എണ്‍പതുകളുടെ പകുതി മുതല്‍ തെണ്ണൂറുകള്‍ വരെ സിനിമയില്‍ നിറസാന്നിധ്യമായിരുന്നു ചെന്നൈക്കാരിയായ താരം. തൂവാനത്തുമ്പികള്‍, താഴ് വാരം, ന്യൂഡല്‍ഹി, ഇസബെല്ല, ഈ തണുത്ത വെളുപ്പാന്‍ കാലത്ത് തുടങ്ങിയ ചിത്രങ്ങളില്‍ നായികയായി തിളങ്ങി സുമലത.