ഇനി അഞ്ജലി അമീറിന്റെ ജീവിതം സിനിമയാവുന്നു

ട്രാന്‍സ് ജെന്‍ഡര്‍ നടിയും മോഡലുമായ അഞ്ജലി അമീറിന്റെ ജീവിതം സിനിമയാകുന്നു. ഗോള്‍ഡന്‍ ട്രബറ്റ് എന്റര്‍ടെയ്ന്‍മെന്റിന്റെ ബാനറില്‍ അനില്‍ നമ്പ്യാരാണ് സിനിമയുടെ നിര്‍മ്മാണം നിര്‍വ്വഹിക്കുന്നത്. ഒരേ സമയം മലയാളത്തിലും തമിഴിലും ഇറങ്ങുന്ന ചിത്രത്തിന്റെ സംവിധാനം  ഡെനി ജോര്‍ജ് ആണ്. മാധ്യമപ്രവര്‍ത്തകനായ വികെ അജിത് കുമാറാണ് ചിത്രത്തിനായി തിരക്കഥ ഒരുക്കുന്നത്. നടി അഞ്ജലി തന്നെയാണ് ചിത്രത്തിലെ കേന്ദ്ര കഥാപാത്രമായെത്തുന്നത്.

ഏറെ പ്രേക്ഷകപ്രശംസ പിടിച്ചുപറ്റിയ മമ്മൂട്ടിയുടെ തമിഴ് ചിത്രമായ പേരന്‍പിലൂടെ ശ്രദ്ധ നേടിയ നടിയാണ് അഞ്ജലി അമീര്‍. ഒരു ട്രാന്‍സ് ജെന്‍ഡറിന്റെ ജീവിതം, അവര്‍ മാനസികമായും ശാരീരകമായും അനുഭവിക്കേണ്ടി വരുന്ന കാര്യങ്ങളൊക്കെ ആഴത്തില്‍ ചര്‍ച്ച ചെയുന്നതായിരിക്കും സിനിമയെന്ന് കഴിഞ്ഞ ദിവസം വാര്‍ത്താ സമ്മേളനത്തില്‍ അഞ്ജലി അമീര്‍ പറഞ്ഞു.

അടുത്തവര്‍ഷം മേയ് പകുതിയോടെയായിരിക്കും ഷൂട്ടിംഗ് ആരംഭിക്കുന്നത്. പൊള്ളാച്ചിയിലും കോഴിക്കോട്ടും ബെംഗലുരുവിലുമായിരിക്കും ചിത്രത്തിന്റെ ചിത്രീകരണം. ഇതിനിടെ, കഴിഞ്ഞ ദിവസം ചാന്ത് പൊട്ട് സിനിമയുമായി ബന്ധപ്പെട്ടുള്ള ചര്‍ച്ചയില്‍ അഞ്ജലി അമീറിന്റെ സോഷ്യല്‍ മീഡിയ കുറിപ്പും വൈറലായിരുന്നു.