പ്രധാനമന്ത്രിയുടെ പ്രസം​ഗം: ബിജെപിയുടെ യു ട്യൂബ് ചാനലിൽ ഡിസ്‌ലൈക്ക് പ്രവാഹം, ഒടുവിൽ ബട്ടൺ ഒഴിവാക്കി രക്ഷപ്പെടൽ

പ്രധാനമന്ത്രി നരേന്ദ്രമോദി രാജ്യത്തെ അഭിസംബോധന ചെയ്ത് ഇന്ന് നടത്തിയ പ്രസം​ഗത്തിന് യു ട്യുബിൽ ലഭിച്ചത് ‍ഡിസ് ലൈക്ക് പ്രവാഹം. ഇതോടെ വീഡിയോയിൽ നിന്നും ലൈക്ക്, ‍ഡിസ് ലൈക്ക് ബട്ടൺ ഒഴിവാക്കി രക്ഷപ്പെടൽ. ബിജെപി തങ്ങളുടെ ഔദ്യോ​ഗിക യു ട്യൂബ് ചാനലിലൂടെ പങ്കുവെച്ച പ്രധാനമന്ത്രിയുടെ പ്രസം​ഗത്തിലാണ് ഡിസ് ലൈക്ക് പ്രതിഷേധവുമായി ജനങ്ങൾ ഒത്തുകൂടിയത്. 

ഉത്തരേന്ത്യൻ സംസ്ഥാനങ്ങളിലെ വലിയ ആഘോഷമായ ദീപാവലി, ദസറ എന്നിവ അടുത്തതോടെ കൊവിഡ് മുൻനിർത്തിയാണ് ചൊവ്വാഴ്ച വൈകുന്നേരം ആറ് മണിക്ക് പ്രധാനമന്ത്രി നരേന്ദ്രമോദി നടത്തിയ പ്രസം​ഗം. ആഘോഷങ്ങൾക്കിടയിൽ ജാ​ഗ്രത കൈവിടരുതെന്നും മാസ്ക് ധരിക്കണമെന്നും സാമൂഹിക അകലം പാലിക്കണമെന്നും കൊവിഡ് വൈറസ് നമുക്ക് ഇടയിൽ നിന്ന് പോയിട്ടില്ലെന്നും രാജ്യത്തെ അഭിസംബോധന ചെയ്യവെ മോദി പറഞ്ഞിരുന്നു. 

Also Read: വരുന്നത് ഉത്സവകാലം, വൈറസ് വിട്ടുപോയിട്ടില്ല, രാജ്യം 10 കോടി പരിശോധനയിലേക്ക് | പ്രധാനമന്ത്രിയുടെ പ്രസം​ഗം അഞ്ച് കാര്യങ്ങൾ

ബിജെപി തങ്ങളുടെ ഔദ്യോ​ഗിക യു ട്യൂബ് ചാനൽ വഴി പ്രസം​ഗത്തിന്റെ വീഡിയോ കൊടുത്തിരുന്നു. ഇതിന് തുടക്കം മുതലെ ലൈക്കിനെക്കാൾ ഡിസ് ലൈക്ക് കുതിക്കുകയായിരുന്നു. പതിനായിരക്കണക്കിന് ഡിസ് ലൈക്ക് വന്നതോടെ പ്രധാന വീഡിയോയിൽ നിന്നും ലൈക്കും, ‍ഡിസ് ലൈക്കും ചെയ്യുന്നതിനുളള ബട്ടൺ ബിജെപി ഒഴിവാക്കി. പ്രധാനമന്ത്രി ഇന്ന് നടത്തിയ പ്രസം​ഗത്തിന്റെ നാല് വീഡിയോ ആണ് ബിജെപി തങ്ങളുടെ യു ട്യൂബ് ചാനലിലൂടെ പ്രസിദ്ധീകരിച്ചത്. ഇതിൽ എല്ലാത്തിനും ലൈക്കിനെക്കാൾ ഡിസ് ലൈക്കാണ് കൂടുതലുളളത്.

ലൈക്ക്, ‍ഡിസ് ലൈക്ക് ബട്ടൺ ഒഴിവാക്കിയ വീഡിയോയിലാകട്ടെ എവിടെ ഡിസ് ലൈക്ക് ബട്ടൺ, ഞങ്ങളുടെ ഡിസ് ലൈക്ക് ബട്ടൺ തിരിച്ചു തരൂ എന്നുളള ചോദ്യങ്ങളാണ് കമന്റായി ഉയരുന്നത്. ബട്ടൺ ഓഫ് ചെയ്തതിനാൽ ഇവിടെ ഡിസ് ലൈക്ക് ചെയ്യുന്നു എന്നുളള ധാരാളം കമന്റുകളുമുണ്ട്. രണ്ട് മാസങ്ങൾക്ക് മുമ്പ് മോദി നടത്തിയ മൻ കി ബാത്ത് പ്രസം​ഗത്തിനും ലക്ഷക്കണക്കിന് ഡിസ് ലൈക്കുകളാണ് ലഭിച്ചത്. രാജ്യത്ത് ലോക്ക് ഡൗൺ പ്രഖ്യാപിച്ച ശേഷം ഇത് ഏഴാമത്തെ തവണയാണ് പ്രധാനമന്ത്രി രാജ്യത്തെ അഭിസംബോധന ചെയ്ത് സംസാരിച്ചത്.