കരിയറിലെ എട്ടാമത്തെ ഹാട്രിക് ആണ് റൊണാൾഡോ കഴിഞ്ഞ ദിവസം നേടിയത്. ഇതോടെ 40 വ്യത്യസ്ത രാജ്യങ്ങൾക്കെതിരെ ഗോൾ നേടുന്ന കളിക്കാരൻ എന്ന ബഹുമതിയും അദ്ദേഹത്തെ തേടിയെത്തി. ഹാട്രിക്കടക്കം നാലു ഗോളുകൾ നേടിയതോടെ യൂറോ ക്വാളിഫയർ മത്സരങ്ങളിൽ ഏറ്റവും കൂടുതൽ ഗോളുകൾ നേടുന്ന കളിക്കാരനുമായി മാറി, റൊണാൾഡോ. മുമ്പ് 23 ഗോളുകളുമായി മുന്നിലുണ്ടായിരുന്ന റോബി കീനിന്റെ റെക്കോർഡാണ് അദ്ദേഹം മറികടന്നത്. മത്സരത്തിനു മുമ്പായി റോബി ക്വീൻ ഇൻസ്റ്റാഗ്രാമിൽ ഇരുവരുടെയും ഗോളുകളുടെ എണ്ണം പറഞ്ഞുകൊണ്ട് പോസ്റ്റ് ചെയ്ത സന്ദേശവും വാർത്തകളിലിടം പിടിച്ചിരുന്നു. 'റൊണാൾഡോ, താങ്കൾക്ക് ഒരു പാട് റെക്കോർഡുകളുണ്ട്. ദയവു ചെയ്ത് ഈ റെക്കോർഡെങ്കിലും എനിക്ക് തന്നെ വിട്ടേക്കൂ..' എന്നായിരുന്നു കീനിന്റെ പോസ്റ്റ്.
എങ്കിലും അന്താരാഷ്ട്രതലത്തിലെത്തുമ്പോൾ ക്രിസ്റ്റ്യാനോയാണ് പോർച്ചുഗൽ ടീമിന്റെ നട്ടെല്ല് എന്ന് വിളിച്ചോതുന്നതായിരുന്നു അദ്ദേഹത്തിന്റെ കഴിഞ്ഞ ദിവസത്തെ പ്രകടനം. എണ്ണം പറഞ്ഞ ഈ നാലു ഗോളുകളോടെ റൊണാൾഡോയുടെ അന്താരാഷ്ട്രമത്സരങ്ങളിലെ ഗോളുകളുടെ എണ്ണം 93 ആയി ഉയർന്നു. ഏഴാം മിനിറ്റിൽ ലഭിച്ച പെനാൽറ്റി കിക്ക് ഗോൾ വലയിലെത്തിച്ചായിരുന്നു റൊണാൾഡോ കളി തുടങ്ങിയത്. തുടർന്ന് മൂന്ന് ഗോളുകൾ കൂടി നേടി നേട്ടം ഉയർത്തി.
കളി കാണാനുണ്ടായിരുന്ന ബ്രിട്ടീഷ് ജേണലിസ്റ്റ് പിയേഴ്സ് മോർഗനടക്കമുള്ളവരുടെ പ്രശംസയും ക്രിസ്റ്റ്യാനോയെ തേടിയെത്തി. ക്ലബ് തലത്തിൽ മെസിയ്ക്ക് ഒരു പടി മുൻതൂക്കമുണ്ടെങ്കിലും അന്താരാഷ്ട്ര തലത്തിൽ റൊണാൾഡോ തന്നെയാണ് ഗോട്ട് (GOAT) എന്ന ട്വീറ്റുമായി മോർഗൻ എത്തിയതോടെ ആരാണ് കേമൻ എന്ന ചർച്ചകൾക്കും സോഷ്യൽ മീഡിയയിൽ വീണ്ടും ജീവൻ വെച്ചിരിക്കുകയാണ്.