ചെന്നൈയിൽ പല ഇടങ്ങളിലും വൈദ്യുതി വിതരണം തടസപ്പെട്ടു. പുതുച്ചേരി മുഖ്യമന്ത്രി വി. നാരായണ സ്വാമിയുടെ വീട് അടക്കം നിരവധി ആളുകളുടെ വീടുകളിൽ വെള്ളം കയറി. ചെന്നൈയിൽ പ്രധാന റോഡുകൾ അടച്ചു. ചെമ്പരപ്പാക്കം തടാകത്തിൽ നിന്ന് പുറത്തേക്കൊഴുക്കുന്ന വെള്ളത്തിന്റെ അളവ് കൂട്ടിയതോടെ നഗരം പ്രളയഭീതിലാണ്. വലിയ കൃഷിനാശവും റിപ്പോർട്ട് ചെയ്തിട്ടുണ്ട്. അതിതീവ്ര ചുഴലിക്കാറ്റിൽ നിന്നും തീവ്രചുഴലിക്കാറ്റായി ശക്തി കുറഞ്ഞെങ്കിലും വടക്കൻ തമിഴ്നാട്ടിൽ കനത്ത മഴ തുടരുമെന്നാണ് അറിയിപ്പ്. ചെന്നൈയിലും പുതുച്ചേരിയിലും ഇപ്പോഴും കനത്ത കാറ്റും മഴയുമാണ്. ചെങ്കൽപ്പട്ട്, വിളുപുരം, നാഗപട്ടണം, തിരുവാരൂർ, തഞ്ചാവൂർ, പുതുക്കോട്ടൈ എന്നീ പ്രദേശങ്ങളിലും കനത്ത മഴ തുടരും. ആന്ധ്രാപ്രദേശിലെ റായലസീമ, ചിറ്റൂർ, കുർണൂൽ, പ്രകാശം, കടപ്പ എന്നീ ജില്ലകളിലും ജാഗ്രത തുടരും.
നിവാറിന്റെ മുൻകരുതൽ നടപടി എന്നവണ്ണം ലക്ഷക്കണക്കിന് ആളുകളെയാണ് മാറ്റിപ്പാർപ്പിച്ചിരിക്കുന്നത്. ചെന്നൈ അടക്കം മറ്റ് തീരദേശ ജില്ലകളിൽ നിന്ന് ഒന്നേകാൽ ലക്ഷം പേരെ സർക്കാർ ഒഴിപ്പിച്ചത് ദുരന്തത്തിന്റെ ആഘാതം വലിയ തോതിൽ കുറയ്ക്കാൻ സഹായിച്ചു. 1,486 ക്യാംപുകൾ നിലവിൽ പ്രവർത്തിക്കുന്നുണ്ട്. 4200 ക്യാമ്പുകൾ പ്രവർത്തനസജ്ജമാണ്. രക്ഷാപ്രവർത്തനം ഇപ്പോഴും തുടരുന്നുണ്ട്. തമിഴ്നാട്ടിലെ 13 ജില്ലകളിൽ ഇന്നും പൊതു അവധി പ്രഖ്യാപിച്ചിട്ടുണ്ട്. അവശ്യസർവീസുകൾ മാത്രമെ ഉണ്ടാകു. കടകളടക്കം ഒരു സ്ഥാപനങ്ങളും ഇന്ന് തുറക്കില്ല. പുതുച്ചേരിയിൽ ശനിയാഴ്ച വരെ പൊതുഅവധിയും നിരോധനാജ്ഞയും പ്രഖ്യാപിച്ചിട്ടുണ്ട്. ജനങ്ങൾ പരമാവധി പുറത്തിറങ്ങരുതെന്നും, വീട്ടിൽ തുടരണമെന്നും സർക്കാർ ആവശ്യപ്പെട്ടു.
ഇനിയാർക്ക് വേണം ലേണിംഗ് ആപ്പ്? ഇനി പഠിക്കാം ഈസിയായി! ഔട്ട്‍ക്ളാസിൽ!