'അത്‌രംഗി രെ' അവസാന ഷെഡ്യൂളിൽ; ധനുഷിന്റെ ബോളിവുഡ് ചിത്രം 2021 വാലെന്റൈന്‍സ് ദിനത്തിലെത്തും

ഒരു ഇടവേളയ്ക്ക് ശേഷം 'അത്‌രംഗി രെ' എന്ന ചിത്രത്തിലൂടെ  വീണ്ടും ബോളിവുഡിലേക്ക്  എത്തുകയാണ് ധനുഷ്. 'അത്‌രംഗി രെ'യിൽ  സാറ അലി ഖാനാണ്   നായികാ കഥാപാത്രത്തെ അവതരിപ്പിക്കുന്നത്. 'ലവ് ആജ് കൽ' എന്ന ചിത്രത്തിന്  ശേഷം സാറാ അലി ഖാൻ നായികയാവുന്ന ചിത്രമാണിത്.

അക്ഷയ് കുമാറും ചിത്രത്തിൽ പ്രധാന വേഷത്തിൽ എത്തുന്നുണ്ട്. ചിത്രത്തിന്റെ അവസാന ഷെഡ്യൂള്‍ ചിത്രീകരണം ഡല്‍ഹിയിലാണ് നടന്നു കൊണ്ടിരിക്കുന്നത്.  ധനുഷ് തന്റെ ഇന്‍സ്റ്റഗ്രാമില്‍ ലൊക്കേഷനില്‍ നിന്നുള്ള ചിത്രം പങ്കു വെച്ചിട്ടുണ്ട്.

ആനന്ദ് എൽ റായ് ആണ് ചിത്രത്തിന്റെ സംവിധായകൻ. ആനന്ദിന്റെ ചിത്രത്തിൽ ഇതിന് മുൻപും ധനുഷ്  അഭിനയിച്ചിട്ടുണ്ട്. 2013ൽ റിലീസ് ആയ 'രാഞ്ച്ന' എന്ന ചിത്രത്തിലാണ് ധനുഷ് ബോളിവുഡിൽ  നായകനായി എത്തിയത്. സോനം കപൂറായിരുന്നു ചിത്രത്തിലെ നായിക. ഏറെ ശ്രദ്ധ നേടിയ ചിത്രമായിരുന്നു അത്.

അക്ഷയ് കുമാറിന്റെ 130-ാമത്തെ ചിത്രം കൂടിയാണ് 'അത്‌രംഗി രെ' . അദ്ദേഹം  തന്റെ സിനിമ ജീവിതത്തിൽ ഇതുവരെ ചെയ്യാത്ത ഒരു കഥാപാത്രത്തെ ആവും ഈ ചിത്രത്തിൽ അവതരിപ്പിക്കുക എന്നാണ് പറഞ്ഞിട്ടുള്ളത്. കഥ കേട്ട് 10 മിനിറ്റിനുള്ളിൽ ഈ കഥാപാത്രം ചെയ്യാൻ അക്ഷയ് സമ്മതിക്കുകയായിരുന്നു.

ദേശിയ പുരസ്‌കാര ജേതാവായ ഹിമാൻഷു ശർമയാണ് ചിത്രത്തിന്റെ തിരക്കഥ. സംഗീതം നിർവഹിക്കുന്നത് എ ആർ റഹ്മാനാണ്.  2021 വാലെന്റൈന്‍സ് ദിനത്തിലാണ് ചിത്രം റിലീസ് ചെയ്യുക.