പൈസയിറക്കി ദുൽഖർ പറയുന്നു; വരനെ ആവശ്യമുണ്ട്

ദുൽഖർ സൽമാൻ നിർമിക്കുന്ന അനൂപ് സത്യൻ ചിത്രത്തിന് പേരിട്ടു. ചിത്രത്തിന്റെ പേര് വരനെ ആവശ്യമുണ്ട്. ദുല്‍ഖര്‍ സല്‍മാന്റെ ഫേസ്ബുക്ക് പോസ്റ്റിലൂടെയാണ് പേര് പുറത്തുവിട്ടത്. സത്യൻ അന്തിക്കാടിന്റെ പുത്രനായ അനൂപ് സത്യൻ തന്നെയാണ്ചിത്രത്തിന്റെ രചനയും നിര്‍വഹിച്ചിരിക്കുന്നത്. 

ഏറെ നാളത്തെ ഇടവേളയ്ക്ക് ശേഷം ശോഭനയും സുരേഷ് ഗോപിയും ഒരുമിക്കുന്ന ചിത്രം കൂടിയാണ് ഇത്. സിനിമയുടെ ലൊക്കേഷന്‍ ചിത്രങ്ങള്‍ സോഷ്യല്‍ മീഡിയയിലൂടെ വൈറലായി മാറിയിരുന്നു. ഈ ചിത്രത്തിലൂടെ കല്യാണി പ്രിയദര്‍ശന്‍ മലയാളത്തില്‍ അരങ്ങേറുകയാണ്. ദുൽഖർ തന്നെയാണ് നായകൻ.

ശോഭന, സുരേഷ് ഗോപി, കല്യാണി പ്രിയദര്‍ശന്‍, ദുല്‍ഖര്‍ സല്‍മാന്‍ എന്നിവരുടെ ചിത്രമുള്ള ഒരു ക്ലാസിഫൈഡ് പേജുമായാണ് ചിത്രത്തിന്റെ പേര് അനൗൺസ് ചെയ്തുള്ള ഫസ്റ്റ്ലുക്ക് പോസ്റ്റർ. വ്യത്യസ്തമായ പോസ്റ്റര്‍ സോഷ്യല്‍ മീഡിയയിലൂടെ ശ്രദ്ധിക്കപ്പെടുകയും ചെയ്തു. മേജർ രവി, ലാലു അലക്സ്, ജോണി ആൻ്റണി തുടങ്ങിയവരും ചിത്രത്തിൽ മറ്റു പ്രധാനവേഷത്തിലെത്തുന്നുണ്ട്.

ഇതിനൊപ്പം തന്നെ തന്റെ രണ്ടാമത്തെ നിർമാണ സംരഭമായ മണിയറയിലെ അശോകൻ എന്ന ചിത്രത്തിന്റെ പോസ്റ്ററും ദുൽഖർ പുറത്തുവിട്ടിട്ടുണ്ട്.