Video | പൊന്തുവളളത്തിൽ അന്നം തേടുന്നവർ

തീരദേശത്തിന്റെ കാഴ്ചയാണ് വീടിന് പുറത്ത് കുത്തിച്ചാരി വെച്ചിരിക്കുന്ന പൊന്തുവളളങ്ങൾ. തെർമ്മോക്കോളും പ്ലാസ്റ്റിക്കും കൊണ്ട് നിർമ്മിച്ച ഈ വളളത്തെ ആശ്രയിച്ച് മൂന്ന് മുതൽ അഞ്ച് കുടുംബങ്ങൾ വരെയാണ് കഴിയുന്നത്. സാധാരണയായി ഒരാൾ തനിച്ചാണ് പൊന്തുവളളത്തിൽ മീൻപിടിക്കാനായി പോകുക. പുലർച്ചെ കടലിൽ പോയി വലനീട്ടുന്ന ഇവർ രാവിലെ ഏഴര- എട്ട് മണിയോടെ തിരിച്ചെത്തും. രണ്ടോ, മൂന്നോ ആളുകളുടെ സഹായത്താൽ വലകുടഞ്ഞ് മീൻ വേർതിരിക്കും.

സമീപകാലത്തായി ആലപ്പുഴ ദേശീയപാതയുടെ രണ്ട് വശങ്ങളിലും ഇത്തരത്തിൽ വല കുടഞ്ഞ് മീൻ വിൽക്കുന്ന നിരവധി പേരെ കാണാമായിരുന്നു. എന്നാൽ കൊവിഡ് നിയന്ത്രണങ്ങൾ ശക്തമായതോടെ ആളുകൾ കൂടുമെന്ന കാരണത്താൽ ഇവരുടെ മത്സ്യവിൽപ്പനയ്ക്കും വിലക്ക് വന്നു. പിടിക്കുന്ന മത്സ്യത്തിന് വില കിട്ടാത്തത്, കടലിലെ ചൊറി മൂലം വല കേടാകുന്നത് അടക്കം നിരവധി പ്രശ്നങ്ങളാണ് പൊന്തുവളളക്കാർ നേരിടുന്നത്. പൊന്തുവളളം ഉപജീവന മാര്‍ഗമാക്കിയവര്‍ അനുഭവിക്കുന്ന ബുദ്ധിമുട്ടുകളെക്കുറിച്ച് പറയുന്നത് കാണാം.