സ്വർണവില വീണ്ടും കൂടി; വർധന വില താഴ്ന്നതിന് പിന്നാലെ; മാറിമറിഞ്ഞു വിപണി

സംസ്ഥാനത്ത് സ്വർണവില വീണ്ടും വർധിച്ചു. ഏതാനും ദിവസങ്ങളായി നിരക്ക് കുറഞ്ഞതിന് പിന്നാലെയാണ് സ്വർണവില വർധിച്ചത്. പവന് 160 രൂപയാണ് കൂടിയത്. ഇതോടെ ഒരു പവൻ സ്വർണത്തിൻ്റെ വില 37,520 രൂപയായി ഉയർന്നു. ഗ്രാമിന് 4690 രൂപയാണ് വില. അന്താരാഷ്ട്ര വിപണിയിൽ ട്രോയ് ഔൺസിന് 1,935.53 ഡോളറാണ് വില. ദേശീയ വിപണിയിൽ പത്തുഗ്രാം തനിത്തങ്കത്തിന് 50,805 രൂപയും.

നേരത്തെ സ്വർണവില 37,360 രൂപയായി കുറഞ്ഞിരുന്നു. കഴിഞ്ഞ ഓഗസ്റ് ഏഴിന് പവന് 42,000 രൂപ എന്ന നിലയിലേക്ക് ഉയർന്നതിന് ശേഷം സ്വർണവിലയിൽ വലിയ തോതിലുള്ള ചാഞ്ചാട്ടം പ്രകടമായിരുന്നു. വില കൂടുകയും കുറയുകയും ചെയ്യുന്ന സാഹചര്യമുണ്ടായിരുന്നു. 

കഴിഞ്ഞ വര്‍ഷം മുതല്‍ ഇന്ത്യയിലെ സ്വര്‍ണ ഇറക്കുമതി തുടര്‍ച്ചയായി കുറയുകയാണ്. സാമ്പത്തിക മാന്ദ്യത്തിനൊപ്പം കൊവിഡ് വ്യാപനം കൂടി സ്വര്‍ണ വിപണിയെ ബാധിച്ചു. ഈ സാമ്പത്തിക വര്‍ഷത്തെ ആദ്യ നാല്  മാസത്തില്‍ (ഏപ്രില്‍- ജൂലൈ 2020)  കാലളവില്‍ ഇറക്കുമതിയിലെ ഇടിവ് 81 ശതമാനമാണ്. ജൂലൈ മാസത്തില്‍ സ്വര്‍ണ ഇറക്കുമതിയില്‍ മുന്‍വര്‍ഷത്തെ അപേക്ഷിച്ച് 24 ശതമാനം കുറവാണ്.