അഞ്ചുദിവസം ഇടിവെട്ടി മഴ; ഒമ്പത് ജില്ലകളില്‍ യെല്ലോ അലര്‍ട്ട്

സംസ്ഥാനത്ത് ഇന്നുമുതല്‍ അഞ്ചുദിവസം കടുത്ത മഴയ്ക്ക് സാധ്യത. ഇടിവെട്ടലോടെ കനത്ത മഴ പെയ്യുമെന്നതിനാല്‍ ഒമ്പത് ജില്ലകളില്‍ യെല്ലോ അലര്‍ട്ട് പ്രഖ്യാപിച്ചു.തിരുവനന്തപുരം,കൊല്ലം, പത്തനംതിട്ട, എറണാകുളം, ഇടുക്കി, തൃശൂര്‍, മലപ്പുറം, കോഴിക്കോട്, വയനാട് എന്നീ ജില്ലകളിലാണ്  ഇന്ന് ( ബുധനാഴ്ച) ജാഗ്രതാ നിർദേശം നല്‍കിയിട്ടുളളത്.

വ്യാഴാഴ്ച വയനാട്, ഇടുക്കി, എറണാകുളം, കോട്ടയം, ആലപ്പുഴ, പത്തനംതിട്ട, കൊല്ലം, തിരുവനന്തപുരം എന്നിങ്ങനെ എട്ട് ജില്ലകളിലും യെല്ലോ അലര്‍ട്ട് നല്‍കിയിട്ടുണ്ട്.

തുടര്‍ച്ചയായ ദിവസങ്ങളില്‍ വ്യാപകമായി മഴയുണ്ടാകും. വരുന്ന മൂന്ന് ദിവസത്തിനുളളില്‍ തുലാവര്‍ഷം എത്തുമെന്നാണ് കാലാവസ്ഥ കേന്ദ്രം അറിയിച്ചത്. തുലാവര്‍ഷത്തിന് അനുകൂലമായ സാഹചര്യങ്ങള്‍ ഒരുങ്ങിയെന്നും തെക്ക് പടിഞ്ഞാറന്‍ കാലവര്‍ഷം ഒരു ദിവസത്തിനകം പിന്‍വാങ്ങുമെന്നും കാലാവസ്ഥാ നിരീക്ഷണ കേന്ദ്രം ഡയറക്ടര്‍ എസ്. സന്തോഷ് പറഞ്ഞു.

മണിക്കൂറില്‍ 65 കിലോമീറ്റര്‍ വരെ കാറ്റ് വീശാന്‍ സാധ്യതയുളളതിനാല്‍ കേരളം, കര്‍ണാടക, ലക്ഷദ്വീപ് തീരങ്ങളില്‍ ബുധനാഴ്ച വരെ മത്സ്യബന്ധനത്തിന് വിലക്കുണ്ട്.