കൊവിഡ് പ്രതിരോധം: ഏറ്റവും മികച്ചതിൽ നിന്ന് കേരളം ഏറ്റവും മോശം അവസ്ഥയിലേക്ക്, വിമർശനവുമായി കേന്ദ്ര ആരോ​ഗ്യമന്ത്രി

കൊവിഡ് പ്രതിരോധത്തിൽ കേരളത്തിനെതിരെ വിമർശനവുമായി കേന്ദ്ര ആരോ​ഗ്യമന്ത്രി ഡോ. ഹർഷവർധൻ. തുടക്കത്തിൽ കാണിച്ച പ്രതിരോധ പ്രവർത്തനങ്ങൾ കേരളത്തിൽ പിന്നീട് ഉണ്ടായില്ല. ഈ വീഴ്ചകൾക്ക് ഇപ്പോൾ വലിയ വില നൽകേണ്ടി വരികയാണ്. പ്രതിവാര സംവാദ പരിപാടിയായ സൺഡേ സംവാദിലെ ടീസറിലാണ് കേരളത്തിനെതിരെയുളള മന്ത്രിയുടെ വിമർശനങ്ങൾ.  കൊവിഡ് പ്രതിരോധത്തിൽ കേരളം ഏറ്റവും മികച്ചതിൽ നിന്ന് മോശമായതിലേക്ക് എങ്ങനെ എത്തിയെന്നതും ഉച്ചയ്ക്ക് സംപ്രേക്ഷണം ചെയ്യുന്ന വീഡിയോയിൽ മന്ത്രി വ്യക്തമാക്കുന്നുണ്ട്.

Also Read: കൊവിഡ്: 10 ദിവസം കഴിഞ്ഞ് പരിശോധന ഇല്ലാതെ ഡിസ്ചാർജ്, രോ​ഗമുക്തിക്ക് ശേഷം ഹോം ക്വാറന്റൈൻ വേണ്ട; വിദ​ഗ്ധ സമിതി ശുപാർശകൾ ഇങ്ങനെ

നിലവിൽ ഇന്ത്യയിലെ കൊറോണ വൈറസിനു ജനിതക പരിവർത്തനം സംഭവിച്ചിട്ടില്ല. മൂക്കിലൂടെ നൽകുന്ന വാക്സിനുകളൊന്നും ഇപ്പോൾ ഇന്ത്യയിലെ ജനങ്ങൾ പരീക്ഷിക്കുന്നില്ലെന്നും (ക്ലിനിക്കൽ ട്രയൽ) മന്ത്രി അറിയിച്ചു. കേരളം കൃത്യമായ കൊവിഡ് മരണക്കണക്കുകൾ പുറത്തുവിടുന്നില്ലെന്ന വിമർശനം നേരത്തേ കേന്ദ്രം ഉന്നയിച്ചിരുന്നു. രാജ്യത്തെ പുതിയ കൊവിഡ് കേസുകളിൽ 15%വും കേരളത്തിൽ നിന്നാണ്. കേരളത്തിന് പുറമെ കർണാടക, ബം​ഗാൾ, രാജസ്ഥാൻ, ഛത്തീസ്​ഗഡ് എന്നി സംസ്ഥാനങ്ങളിലാണ് പുതിയ കൊവിഡ് കേസുകൾ ഉയരുന്നത്.

സംസ്ഥാനത്ത് ഇന്നലെ വരെയുളള കണക്കുകള്‍ പ്രകാരം 96,004 ആളുകളാണ് കൊവിഡ് ബാധിച്ച് ചികിത്സയിലുളളത്. ഇന്നലെ മാത്രം 9,016 പേര്‍ക്ക് കൊവിഡ് സ്ഥിരീകരിച്ചു. ഇതുവരെ 1,139 പേരാണ് കൊവിഡ് ബാധിച്ച് മരിച്ചത്. ഇന്നലെ മാത്രം 26 പേരുടെ മരണങ്ങള്‍ കൊവിഡിനെ തുടര്‍ന്നാണ്. സംസ്ഥാനത്തെ വിവിധ ജില്ലകളിലായി 2,76,900 പേരാണ് ഇപ്പോള്‍ നിരീക്ഷണത്തിലുള്ളത്. ഇവരില്‍ 2,51,935 പേര്‍ വീട്/ഇന്‍സ്റ്റിറ്റിയൂഷണല്‍ ക്വാറന്റൈനിലും 24,965 പേര്‍ ആശുപത്രികളിലും നിരീക്ഷണത്തിലാണ്. 2,971 പേരെയാണ് ഇന്നലെ ആശുപത്രിയില്‍ പ്രവേശിപ്പിച്ചത്. സംസ്ഥാനത്തെ ടെസ്റ്റ് പോസിറ്റിവിറ്റി നിരക്കും രോ​ഗബാധിതരുടെ എണ്ണവും കൂടുമ്പോൾ പരിശോധനകൾ സർക്കാർ കുറയ്ക്കുകയാണെന്ന ആരോപണം പ്രതിപക്ഷ നേതാവ് അടക്കം നേരത്തെ ഉന്നയിച്ചിരുന്നു.