​ഗെയിലിനെ ദുബായിൽ സുഖവാസത്തിന് കൊണ്ടുവന്നതാണോ?; പഞ്ചാബേ, വീട്ടിൽ സ്വർണം വെച്ചിട്ടെന്തിന് നാട്ടിൽ തേടി നടപ്പൂ..

ഐ പി എൽ പാതിവഴിയിലെത്തിയപ്പോഴും അവസരം ലഭിക്കാതെ കഴിയേണ്ടി വന്നവരിൽ സാക്ഷാൽ ക്രിസ് ​ഗെയിലാണ് മുന്നിൽ. ലോകത്തിലെ ഏത് ട്വന്റി 20 ടീമിലും പ്ലേയിങ് ഇലവനിൽ ഒന്നാമത്തെ ചോയ്സാവുന്ന ​യൂണിവേഴ്സൽ ബോസിനെ ഇതുവരെയും ടീമിലുൾപ്പെടുത്താൽ പഞ്ചാബിന്റെ കോച്ച് കുംബ്ലെയ്ക്ക് തോന്നിയിട്ടില്ല. 

കുട്ടി ക്രിക്കറ്റിലെ രാജാവായ കിങ്‌സ് ഇലവന്‍ പഞ്ചാബിന്റെ വിന്‍ഡീസ് ഇതിഹാസം ക്രിസ് ഗെയ്‌ലിനെ ഈ സീസണില്‍ യുഎഇയിൽ സുഖവാസത്തിന് കൊണ്ടുവന്നതാണോ എന്നാണ് ആരാധകരുടെ ചോദ്യം. ഓരോ മത്സരത്തിനു മുമ്പും ക്യാപ്റ്റൻ കെ എൽ രാഹുലാവട്ടെ, ​ഗെയിൽ ലോകത്തിലെ ഏറ്റവും അപകടകാരിയായ കളിക്കാരനാണെന്ന സർടിഫിക്കറ്റ് നൽകുന്നുണ്ട് താനും.

ഈ സീസണില്‍ കെഎല്‍ രാഹുലിന്റെ ഓപ്പണിങ് പങ്കാളി മായങ്ക് അഗര്‍വാളാണ്. ഇരുവരും മികച്ച പ്രകടനമാണ് നടത്തിക്കൊണ്ടിരിക്കുന്നത്. ഇതോടെ ഗെയ്‌ലിന്റെ വഴിയടയുകയായിരുന്നു. 

ഐപിഎല്ലില്‍ മാത്രമല്ല ലോകമെമ്പാടുമുള്ള വിവിധ ഫ്രാഞ്ചൈസി ലീഗുകളിലെ അവിഭാജ്യ ഘടകമാണ് ഈ 41 കാരന്‍. പഞ്ചാബ് ഈ സീസണിലെ പോയിന്റ് പട്ടികയില്‍ അവസാന സ്ഥാനത്തായിട്ടും ഗെയ്ല്‍ ടീമിനു പുറത്തു തന്നെയാണ്.

​ഗെയിലിന്റെ ടി20 റെക്കോർഡുകൾ ഇതാ:

1- ഐപിഎല്‍ ചരിത്രത്തിലെ എക്കാലത്തെയും വലിയ വ്യക്തിഗത സ്‌കോര്‍ അദ്ദേഹത്തിന്റെ (175) പേരിലാണ്. അന്ന് ​ഗെയിൽ സെഞ്ച്വറി തികച്ചത് 30 പന്തുകളിൽ നിന്ന്. ടി20 ചരിത്രത്തിലെ ഏറ്റവും വേ​ഗമേറിയ സെഞ്ച്വറി.
2- ടൂര്‍ണമെന്റില്‍ ഏറ്റവുമധികം സിക്‌സറുകള്‍ നേടിയതും ഗെയ്ല്‍ തന്നെ (326 സിക്‌സര്‍). 
3- 125 മത്സരങ്ങളിൽ നിന്നായി 4484 റൺസും 18 വിക്കറ്റുമാണ് ഐ പിഎല്ലിലെ ​ഗെയിലിന്റെ സമ്പാദ്യം. അതും 151. 3 എന്ന സ്ട്രൈക്ക് റേറ്റിൽ. ഇതിൽ ആറ് ‍സെഞ്ച്വറിയും ഉൾപ്പെടും, ഐപിഎല്ലിലെ ഒരു കളിക്കാരനും ഇത്ര സെഞ്ച്വറിയെണ്ണം ഇല്ല. 
4- എല്ലാ ട്വന്റി 20 മത്സരങ്ങളിലേയും കൂടി ഏറ്റവും കൂടുതൽ റൺസ് (13,296 runs - as of April 2020)
5- ടി20 യിൽ 10000 റൺസ് തികയ്ക്കുന്ന ആദ്യ ബാറ്റ്സ്മാൻ.
6- ഏറ്റവും കൂടുതൽ ടി20 സെഞ്ച്വറികൾ (22)
7- ഐപിഎല്ലിലെ വേ​ഗതയേറിയ 4000 റൺസ്
8- 300 IPL സിക്സർ തികയ്ക്കുന്ന ആദ്യ കളിക്കാരൻ
9- പരാജയപ്പെട്ട കളിയിലെ ഉയർന്ന സ്കോർ (151*)
10 ഒരു ടി20 ഫൈനലിലെ ഉയർന്ന സ്കോർ (146*)
11- യുവരാജ്, ഹസ്രത്തുള്ള സാസൈ എന്നിവർക്കൊപ്പം പങ്കുവക്കുന്ന വേ​ഗതയേറിയ ടി20 ഫിഫ്റ്റി, 12 പന്തുകളിൽ നിന്ന്.
12- ഒരു ടി20 ഇന്നിങ്സിലെ ഏറ്റവും കൂടുതൽ സിക്സറുകൾ- 18 എണ്ണം.