'മുഖം മറച്ചതിന്റെ പേരിൽ ഉയർന്ന വിമർശനങ്ങളും ട്രോളുകളും വേദനിപ്പിച്ചു'; എ.ആർ.റഹ്മാന്റെ മകൾ ഖദീജ

സംഗീത സംവിധായകൻ എ ആർ റഹ്മാന്റെ മകൾ ഖദീജ അവരുടെ വസ്ത്രധാരണവുമായി ബന്ധപ്പെട്ട് സമൂഹമാധ്യമങ്ങളിൽ വിമർശനം ഉയർന്നിരുന്നു. ബുർഖധരിച്ച് പൊതുവേദികളിൽ എത്തുന്നു എന്ന് പറഞ്ഞാണ്  ഖദീജയെ സമൂഹമാധ്യമങ്ങളിൽ വിമർശിച്ചത്.

രാജ്യത്ത്  നിരവധി  പ്രശ്നങ്ങൾ നടക്കുമ്പോഴും തന്റെ വസ്ത്രധാരണത്തെ കുറിച്ചാണോ ആളുകളുടെ ചർച്ച എന്നായിരുന്നു വിമർശിക്കുന്നവരോടുളള ഖദീജയുടെ ചോദ്യം. മുഖം മറച്ചു എന്നതിന്റെ പേരിൽ  തനിക്കെതിരെ ഉയരുന്ന വിമർശനങ്ങളും വിവാദങ്ങളും ട്രോളുകളും  എല്ലാം തന്നെ വല്ലാതെ അസ്വസ്ഥപ്പെടുത്തിയിരുന്നു. തുടക്കത്തിൽ ഇതോർത്ത് സങ്കടപ്പെട്ടിരുന്നുവെങ്കിലും അതിനോട് പൊരുത്തപ്പെട്ട് തുടങ്ങിയെന്ന് ഖദീജ പറയുന്നു.

ബുർഖ ധരിക്കാൻ  താൻ  എടുത്ത  തീരുമാനത്തെ കുറിച്ച് ഓർക്കുമ്പോൾ  അഭിമാനമുണ്ടെന്നും ഒരാളുടെ വസ്ത്രധാരണത്തെക്കുറിച്ച് മറ്റുള്ളവർ നടത്തുന്ന  വിലയിരുത്തലുകൾ  അത്തരക്കാരുടെ  സ്വഭാവത്തെ വെളിപ്പെടുത്തുന്നതാണെന്നും ഖദീജ  അഭിപ്രായപ്പെട്ടു.

റഹ്മാൻ  ഈണം നൽകി ഖദീജ ആലപിച്ച 'ഫരിശ്തോ' എന്ന ഗാനത്തെ കുറിച്ച്  മാധ്യമങ്ങളോട് സംസാരിക്കുമ്പോഴാണ് ഖദീജ  ഇക്കാര്യങ്ങൾ വ്യക്തമാക്കിയത്..