പ്രണയാർദ്രയായ നായിക തന്റെ ജനാലയ്ക്കരികിൽ നിന്നും പൂർണ ചന്ദ്രനെക്കാണുമ്പോൾ ഉള്ളിലുദിക്കുന്ന ഭാവനകളാണ് ഈ വരികളിൽ. പൗർണമിയിലെ ചന്ദ്രനെ കണിവെള്ളരിയായിക്കാണുന്ന രചനാപാടവം. അതുപോലെ "മഴവില്ലിന്‍ പീലി ചുരുക്കി, പകലാകും പൊന്‍മയില്‍ പോയാല്‍" എന്നവരികളിൽ വീണ്ടും പീലിവിടർത്തുന്ന ഭാവനയുടെ നിറങ്ങളാണ് തെളിയുന്നത്. "ഇരുളുന്ന മാനത്തിന്റെ,കരിനീലക്കാടുകള്‍ തോറും, കരയാമ്പൂ നുള്ളിനടക്കും" തുടങ്ങിയ പ്രയോഗങ്ങളും ഗാനരചയിതാവിന്റെ കവിത്വം എടുത്തുകാട്ടുന്നതാണ്. 

വായിക്കാം: ഏഴ് സുന്ദരരാത്രികളിലെ ഇഴയടുപ്പം

പഹാഡി രാഗത്തിൽ കെ. രാഘവൻ നൽകിയ ഈണം ഈ വരികളോട് പുലർത്തുന്ന ചേർച്ച അനന്യസാധാരണമാണ്. പ്രിലൂഡിലെ ഫ്ലൂട്ടിന്റെ  പീസ് അനുഷ്ഠിക്കുന്ന ഗാനവിളംബരം, ഇന്റർല്യൂഡിൽ ബാംസുരി കഴിഞ്ഞെത്തുന്ന സ്ട്രിങ് നോട്ടുളൊക്കെ വഹിക്കുന്ന ദൗത്യം അതീവ പ്രസന്നാത്മകവും ഉണർവ്വേകുന്നതുമാണ്. ചെറിയ ചെറിയ ലിങ്കുകൾ പോലും മിഴിവാർന്നവയാണ്. 

പി.സുശീല തന്റെ  അനുകരണീയ ശൈലിയിൽ പൂനിലാവ് പോലെ പാടിയൊഴുകുകയാണ് ഈ ഗാനം. 
പ്രകൃതിയുടെ ലീലാവിലാസങ്ങൾക്കൊപ്പം ചേർന്നൊഴുകുന്ന   പ്രണയ വിവശയായ കന്യകയുടെ അന്തരംഗ വിചാരങ്ങളാണീ മധുരഗാനം. 

വായിക്കാം, കാണാം: 'താമരത്തോണി'യിലെ ശ്രീകുമാരന്‍തമ്പിയും ബാബുരാജും