പാലത്തായി കേസിൽ ഐജി ശ്രീജിത്തിനെ മാറ്റി; പുതിയ അന്വേഷണ സംഘത്തെ നിയമിക്കാൻ ഉത്തരവിട്ടു ഹൈക്കോടതി

പാലത്തായി കേസിൽ പുതിയ അന്വേഷണ സംഘത്തെ രൂപീകരിക്കാൻ ഹൈക്കോടതി ഉത്തരവിട്ടു. കേസ് അന്വേഷിക്കാൻ ഐജി റാങ്കിലുള്ള ഉദ്യോഗസ്ഥനെ നിയോഗിക്കണമെന്നും നിലവിലെ ഉദ്യോഗസ്ഥരെ മാറ്റി പുതിയ സംഘത്തെ രണ്ടാഴ്‌ചയ്‌ക്കകം നിയമിക്കണമെന്നും കോടതി വ്യക്തമാക്കി. കേസിൻ്റെ മേൽനോട്ടം ഐജി ശ്രീജിത്തിന് പകരം മറ്റൊരു ഉദ്യോഗസ്ഥനെ ഏൽപ്പിക്കാനും കോടതി നിർദേശിച്ചു. കേസിൽ അന്വേഷണ സംഘത്തെ മാറ്റണമെന്നു ആവശ്യപ്പെട്ടു പെൺകുട്ടിയുടെ മാതാവ് നൽകിയ ഹർജി  പരിഗണിച്ചാണ് കോടതി വിധി. ഹർജിയെ എതിർക്കാതിരുന്ന സർക്കാർ പീഡനത്തിരയായ പെൺകുട്ടിക്കൊപ്പമാണെന്നും കോടതിയിൽ വ്യക്തമാക്കി. കണ്ണൂർ പാലത്തായിയിൽ നാലാംക്ലാസ് വിദ്യാർത്ഥിനിയെ പീഡിപ്പിച്ച കേസിലാണ് കോടതി പുതിയ ഉത്തരവ് പുറപ്പെടുവിച്ചത്.  

കേസിൽ പ്രതിയായ പാലത്തായിയിലെ ബിജെപി നേതാവും അധ്യാപകനുമായ കുനിയിൽ പദ്മരാജന് നേരത്തെ ജാമ്യം ലഭിച്ചിരുന്നു. ലോക്കൽ പൊലീസ് ചുമത്തിയ പോക്സോ പിന്നീട് കേസ് അന്വേഷിച്ച ക്രൈം ബ്രാഞ്ച് ഒഴിവാക്കുകയായിരുന്നു. ഇതിനെ തുടർന്നാണ് ജാമ്യം ലഭിച്ചത്. ശാസ്ത്രീയ തെളിവുകള്‍ ഇല്ലാത്തതിനാല്‍ പോക്‌സോ വകുപ്പുകള്‍ ചുമത്തിയിട്ടില്ലെന്നാണ് അന്വേഷണ സംഘം പറഞ്ഞത്. അതേസമയം വിദ്യാര്‍ത്ഥിനിയെ അധ്യാപകന്‍ ശാരീരികമായി ഉപദ്രവിച്ചെന്ന് ക്രൈംബ്രാഞ്ച് അന്വേഷണ സംഘം കണ്ടെത്തിയിരുന്നു. 

പ്രായപൂർത്തിയാകാത്ത പെൺകുട്ടിക്ക് കള്ളം പറയുന്ന സ്വഭാവമുണ്ടെന്നും ക്രൈം ബ്രാഞ്ച് സം​ഘം ഹൈക്കോടതിയിൽ നേരത്തെ സമർപ്പിച്ച റിപ്പോർട്ടിൽ പറഞ്ഞിരുന്നു. സാമൂഹ്യനീതി വകുപ്പിലെ ക്ലിനിക്കൽ സൈക്കോളജിസ്റ്റുമാർ നൽകിയ വിവരങ്ങൾ മുൻനിർത്തിയായിരുന്നു ഈ റിപ്പോർട്ട്. പെൺകുട്ടി പലതും സങ്കൽപ്പിച്ച് പറയുന്ന സ്വഭാവക്കാരിയാണെന്നും പീഡനപരാതിയിലെ കാര്യങ്ങൾ ഭാവന മാത്രമാണെന്നുമാണ് ക്രൈം ബ്രാഞ്ച് മേധാവി ഐജി എസ് ശ്രീജിത്തിന്റെ നേതൃത്വത്തിലുളള അന്വേഷണ  സംഘം റിപ്പോർട്ടിൽ പറഞ്ഞത്. ഇതിന് പിന്നാലെ കേസ് അന്വേഷിക്കുന്ന ക്രൈം ബ്രാഞ്ചിന്റെ ചുമതലയുളള ഐജി എസ് ശ്രീജിത്തിന്റെ ശബ്ദസന്ദേശം സോഷ്യല്‍മീഡിയയില്‍ പ്രചരിച്ചത് ഏറെ വിവാദമായിരുന്നു. ശ്രീജിത്തിന്റെ ശബ്ദ സന്ദേശം കേസിലെ പ്രതിയായ പദ്മരാജന് അനുകൂലമാണെന്നും അന്വേഷണം അട്ടിമറിക്കാനുളള നീക്കമാണിതെന്നും വിമര്‍ശനങ്ങള്‍ ഉയര്‍ന്നിരുന്നു.