വോട്ടിന് 'ലോണ്‍': തെരഞ്ഞെടുപ്പുകാലത്ത് കര്‍ഷകര്‍ക്ക് മോഹവില

വായ്പാ ഇളവുകളിലെ രാഷ്ട്രീയം ഓരോ തിരഞ്ഞെടുപ്പിലെയും ഏറ്റവും ശ്രദ്ധേയമായ വാഗ്ദാനങ്ങളിലൊന്നാണ്. വിജയത്തിന് കര്‍ഷകരുടെ വോട്ട് വേണം. വായ്പ എഴുതിത്തള്ളും എന്നതായിരിക്കും അതിലെ ഏറ്റവും സുപ്രധാന വാഗ്ദാനം. പക്ഷെ ഭരണം ലഭിച്ചുകഴിഞ്ഞാല്‍, എന്താകും സ്ഥിതി. സംസ്ഥാന സര്‍ക്കാരിന്റെ ധനബാധ്യതകള്‍ കണക്കിലെടുത്തേ സര്‍ക്കാര്‍ തീരുമാനങ്ങളിലേക്ക് പോകൂ. ചിലര്‍ ഉടന്‍ ഇളവ് നല്‍കി. മറ്റുള്ളവര്‍ ഇളവുകള്‍ മറന്നു.

ഉത്തര്‍പ്രദേശില്‍ ബിജെപി 2017 നിയമസഭാ തിരഞ്ഞെടുപ്പിന് മുമ്പ് വാഗ്ദാനം ചെയ്തത് വായ്പ എഴുതിത്തള്ളുമെന്നായിരുന്നു. കര്‍ണാടകത്തില്‍ ബിജെപിയും ജെഡിഎസും ഇതേ വാഗ്ദാനം വോട്ടിനായി മുന്നോട്ടുവെച്ചു. മധ്യപ്രദേശില്‍ ശിവരാജ് സിങ് ചൗഹന്റെ തുടര്‍ഭരണത്തെ വീഴ്ത്താന്‍ കോണ്‍ഗ്രസ് പ്രയോഗിച്ചതും കര്‍ഷക വായ്പകള്‍ എഴുതിത്തള്ളുന്നതാണ്.
 

ഒരു സംസ്ഥാനവും അതിലേക്ക് അത്ര തീവ്രമായി ഒറ്റയടിക്ക് കടന്നില്ല. റിസര്‍വ് ബാങ്ക് പുറത്തുവിട്ട ചില കണക്കുകളുണ്ട്. അഞ്ചുവര്‍ഷത്തിനിടെ 10 സംസ്ഥാനങ്ങള്‍ വായ്പാ ഇളവ് പ്രഖ്യാപിച്ചു. 2.36 ലക്ഷം കോടി (ട്രില്യണ്‍) രൂപയുടേതായിരുന്നു ഇത്. കര്‍ണാടകം ഏറ്റവും മുന്നിലെത്തി. 44,0000 കോടി രൂപയുടെ ഇളവ് നല്‍കി. ഉത്തര്‍പ്രദേശ് 36,000 കോടിയും മഹാരാഷ്ട്ര 34,000 കോടിയും ഇളവ് കൊടുത്ത് പിന്നാലെ നിന്നു.
 
പത്ത് സംസ്ഥാനങ്ങള്‍- ആന്ധ്രാപ്രദേശ്, തെലങ്കാന, തമിഴ്നാട്, മഹാരാഷ്ട്ര, ഉത്തര്‍പ്രദേശ്, പഞ്ചാബ്, കര്‍ണാടക, രാജസ്ഥാന്‍, മധ്യപ്രദേശ്, ഛത്തീസ്ഗഡ് എന്നിവര്‍ 2014-15ല്‍ വായ്പ എഴുതിത്തള്ളല്‍ പ്രഖ്യാപിച്ചു. നടപ്പാക്കിയത് ഘട്ടം ഘട്ടമയി മാത്രം.

വോട്ട് ലക്ഷ്യമിട്ടുള്ള രാഷ്ട്രീയ പാര്‍ട്ടികളുടെ ഈ പ്രഖ്യാപനങ്ങള്‍ കര്‍ഷകരിലും ബാങ്കുകളിലും എന്ത് പ്രതിഫലനമാണ് ഉണ്ടാക്കുന്നത്. ഇപ്പോള്‍ എഴുതിതള്ളും എന്നതോന്നലില്‍ കര്‍ഷകര്‍ തിരിച്ചടവ് നിര്‍ത്തുന്നു. ബാങ്കുകള്‍ പിരിച്ചെടുക്കല്‍ യത്നത്തിലേക്ക് കടക്കാതെ നില്‍ക്കുന്നു. അതോടെ ബാങ്കുകളിലെ കിട്ടാക്കടം പെരുകും.

'തിരഞ്ഞെടുപ്പ് കാലത്താണ് നടത്തുന്ന വായ്പാ എഴുതിത്തള്ളല്‍ പ്രഖ്യാപനങ്ങള്‍ കര്‍ഷകരുടെ പ്രശ്നങ്ങള്‍ പരിഹരിക്കാനുള്ള ഒറ്റമൂലിയല്ല. വാസ്തവത്തില്‍ അത് വായപ തിരിച്ചടയ്ക്കുകയെന്ന സംസ്‌കാരത്തെ തന്നെ ഇല്ലാതാക്കുന്നു. കര്‍ഷകര്‍ക്ക് ഇതുകൊണ്ട് വലിയ പ്രയോജനം ലഭിക്കില്ല.'- റിസര്‍വ് ബാങ്കിന്റെ റിപ്പോര്‍ട്ടില്‍ പറയുന്നു.

ഘട്ടംഘട്ടമായി ഇളവ് നല്‍കുന്നതിലൂടെ ബാങ്കുകള്‍ക്ക് വായ്പാ കുടിശികയുടെ ഒരുഭാഗം മാത്രമേ കിട്ടുന്നുള്ളൂ. ഇത് മാത്രമല്ല, വായ്പാ ഇളവുകള്‍ നല്‍കുന്ന സര്‍ക്കാര്‍ കാര്‍ഷിക മേഖലയിലെ മറ്റ് പദ്ധതി ചെലവുകളാണ് കുറയ്ക്കുക. ഇതിന്റെ ഫലമായി ബാങ്കുകള്‍ കര്‍ഷകര്‍ക്ക് വീണ്ടും വായ്പ നല്‍കേണ്ടിവരുന്നു.

ഉത്തര്‍പ്രേദശിലെ യോഗി ആദിത്യനാഥ് സര്‍ക്കാരും മഹരാഷ്ട്രയിലെ ദേവന്ദ്ര ഫട്നാവിസ് സര്‍ക്കാരും ഇളവുകള്‍ നല്‍കിയത് ഘട്ടംഘട്ടമായിരുന്നു. യോഗി ആദിത്യനാഥ് സര്‍ക്കാര്‍ കഴിഞ്ഞ രണ്ടുവര്‍ഷം അനുവദിച്ചത് 26,000 കോടിയുടെ ഇളവാണ്. പ്രഖ്യാപിച്ച 36000 കോടിയിയുടെ മൂന്നിലൊന്ന് ഇപ്പോഴും ബാക്കിയാണ്. മധ്യപ്രദേശ് സര്‍ക്കാര്‍ കഴിഞ്ഞ സാമ്പത്തിക വര്‍ഷം 5000 കോടിയും ഈ സാമ്പത്തിക വര്‍ഷം 8,000 കോടിയും അനുവദിച്ചു. ആകെ പ്രഖ്യാപിച്ചതിന്റെ മൂന്നിലൊന്നില്‍ അല്‍പം കൂടുതല്‍. ഫട്നാവിസ് സര്‍ക്കാര്‍ 34000 കോടി പ്രഖ്യാപിച്ച കഴിഞ്ഞ രണ്ടുവര്‍ഷം അനുവദിച്ചത് 22,000 കോടി രൂപ മാത്രം.

ആന്ധ്രാപ്രദേശ് 2014-15ല്‍ 24,000 കോടി രൂപയുടെ കാര്‍ഷിക വായ്പകള്‍ എഴുതിത്തള്ളുതനായി പ്രഖ്യാപിച്ചു. അഞ്ചുവര്‍ഷം കൊണ്ട് ഇതിന്റെ പകുതി മാത്രമാണ് യാഥാര്‍ഥ്യമായത്. ഓരോ സാമ്പത്തിക വര്‍ഷവും അല്‍പ്പാല്‍മായാണ് സര്‍ക്കാര്‍ ഇതിനുള്ള പണം നീക്കിവെച്ചത്. 2014-15ല്‍ 4000 കോടി, 2015-16ല്‍ 740 കോടി, 2016-17ല്‍ 3,500 കോടി, 2017-18ല്‍ 3,600 കോടി, ബജറ്റില്‍ 24,000 കോടി പ്രഖ്യാപിച്ച സര്‍ക്കാര്‍ അഞ്ചുവര്‍ഷത്തിന് ശേഷം എഴുതി തള്ളിയത് പകുതി മാത്രം, 12700 കോടി രൂപ.

കെ ചന്ദ്രശേഖര്‍ റാവു സര്‍ക്കാര്‍ 2014-15ല്‍ ആദ്യതവണ അധികാരത്തില്‍ വന്നപ്പോള്‍ വായ്പാ ഇളവ് പ്രഖ്യാപിച്ചു. 17,000 കോടി രൂപയുടേതായിരുന്നു പ്രഖ്യാപനം. ഘട്ടംഘട്ടമായാണ് ഇതും നടപ്പാക്കിയത്. 2014-15ല്‍ 4,200 കോടി, 2015-16ല്‍ 4250 കോടി, 2016-17ല്‍ 2,960 കോടി, 2017-18ല്‍ 2,960 കോടി. ആകെ നല്‍കിയത് 14,400 കോടിരൂപ മാത്രം.

കടം എഴുതിത്തള്ളല്‍ എന്നത് ശരിയായ മാര്‍ഗമല്ലെന്നാണ് റിസര്‍വ് ബാങ്കിന്റെ വിലയിരുത്തല്‍. ഇതിന് പകരം കാര്‍ഷിക മേഖലയില്‍ വരുമാനം കൂട്ടാന്‍ ഉതകുന്ന നയങ്ങളാണ് സര്‍ക്കാര്‍ സ്വീകരിക്കേണ്ടതെന്ന് റിസര്‍വ് ബാങ്ക് നിര്‍ദേശിക്കുന്നു. ഉത്പാദന ചെലവ് കുറയ്ക്കാവുന്ന വിധത്തില്‍ സബ്സിഡികള്‍ നല്‍കുകയാണ് കടം എഴുതിത്തള്ളുന്നതിനേക്കാള്‍ അഭികാമ്യമെന്നാണ് റിസര്‍വ് ബാങ്കിന്റെ റിപ്പോര്‍ട്ടില്‍ പറയുന്നത്.