750 ​ഗോളുകൾ, 750 സന്തോഷനിമിഷങ്ങൾ, ആരാധകരുടെ മുഖത്തെ 750 മന്ദസ്മിതങ്ങൾ..; അടുത്ത ലക്ഷ്യം 800!

ചാംപ്യൻസ് ലീ​ഗിൽ ഡൈനാമോ കീവിനെതിരെ യൂവന്റസ് മറുപടിയില്ലാത്ത മൂന്ന് ​ഗോളിന് ജയിച്ചപ്പോൾ അതിലൊന്ന് സൂപ്പർ താരം ക്രിസ്റ്റ്യാനോ റൊണാൾഡോയുടെ വകയായിരുന്നു. റൊണാൾഡോയുടെ കരിയറിലെ 750 ാമത് ​ഗോൾ. ​ഗോൾ നേടി ടീമിനെ വിജയപഥത്തിലെത്തിച്ചതിനു ശേഷം റൊണാൾഡോ പ്രഖ്യാപിക്കുകയും ചെയ്തു. 

750 ​ഗോൾ, 750 സന്തോഷനിമിഷങ്ങൾ, ആരാധകരുടെ മുഖത്തെ 750 മന്ദസ്മിതങ്ങൾ. എന്റെ എല്ലാ സഹകളിക്കാർക്കും കോച്ചുമാർക്കും എതിരാളികൾക്കും നന്ദി. അടുത്ത ലക്ഷ്യം 800 ആണ്!

35 കാരനായ റൊണാൾഡോ റയൽ മാഡ്രിഡിനായി 450 ​ഗോളുകൾ നേടിയപ്പോൾ മാഞ്ചസ്റ്റർ യുണൈറ്റഡിനായി നേടിയത് 118 ​ഗോളുകളാണ്. രാജ്യമായ പോർച്ചു​ഗലിനു വേണ്ടി 102 ഉം ഇപ്പോഴത്തെ ക്ലബായ യൂവന്റസിനായ 75 ​ഗോളുകളും വാരിക്കൂട്ടി. സ്പോർട്ടിങ്ങിനായി അഞ്ചും.

മെസിയ്ക്കും സലായ്ക്കും ലെബഡോവ്സ്കിയ്ക്കകും റാമോസിനും എംബപ്പായ്ക്കുമൊപ്പം ഈ വർഷത്തെ ഫിഫ മികച്ച താരത്തിനുള്ള നോമിനേഷൻ ലിസ്റ്റിലും റൊണാൾഡോ സ്ഥാനം പിടിച്ചിട്ടുണ്ട്. ഡിസംബർ 17 നായിരിക്കും അവാർഡ് പ്രഖ്യാപനം. 

കരിയറിലെ നല്ല ഭാ​ഗം റയലിനായി ബൂട്ട് കെട്ടിയ റൊണാൾഡോ 2 വർഷം മുമ്പാണ് ഇറ്റാലിയൻ ക്ലബായ യൂവന്റസിലേക്ക് ചേക്കേറിയത്. അവിടെയും തന്റെ 30 കളിലും റൊണാൾഡോ മികച്ച ഫോം തെളിയിച്ചുകൊണ്ടിരിക്കുകയാണ്. 

30 വയസിനു മുമ്പ് റൊണാൾഡോ രാജ്യത്തിനായി ഇറങ്ങിയ 118 മത്സരങ്ങളിൽ നിന്ന് നേടിയത് 52 ​ഗോളുകളായിരുന്നു. അതിനു ശേഷം റൊണാൾഡോ 47 മത്സരങ്ങളിൽ നിന്നായി കഴിഞ്ഞ മാസം സ്വീഡനെതിരെയുള്ള മത്സരം വരെ നേടിയത്  49 ​ഗോളുകൾ ആയിരുന്നു. അതായത് ഒരു കളിയിൽ 1.04 ​ഗോളുകൾ 30 വയസിനു ശേഷം അടിച്ചുകൂട്ടുന്നുവെന്ന് സാരം.