മല കയറുമ്പോൾ മാത്രം മാസ്ക് ഒഴിവാക്കാം, ഒരു ദിവസം 250 പേർക്ക് ദര്‍ശനം; ശബരിമല കയറുന്നവർ അറിയേണ്ടത്

ശബരിമല തുലാമാസ പൂജകൾക്കായി നാളെ നട തുറക്കുകയാണ്. കൊവിഡ് നെ​ഗറ്റീവ് സർട്ടിഫിക്കെറ്റ് ഉളളവർക്ക് മാത്രമായിരിക്കും ദർശനത്തിന് അനുമതി. കൂടാതെ മലകയറാനുളള ആരോ​ഗ്യസ്ഥിതി ഉണ്ടെന്നുളള മെഡിക്കൽ ഫിറ്റ്നെസ് സർട്ടിഫിക്കെറ്റും കരുതണം. മുഖ്യമന്ത്രി പിണറായി വിജയനാണ് വാർത്താസമ്മേളനത്തിൽ ഇക്കാര്യങ്ങൾ അറിയിച്ചത്.

ശബരിമല ദര്‍ശനത്തിന് ഒരുങ്ങുന്നവര്‍ അറിയേണ്ടത്

• വെര്‍ച്വല്‍ ക്യൂ വഴി രജിസ്റ്റര്‍ ചെയ്ത 250 ഭക്തര്‍ക്കാണ് ഒരു ദിവസം ദര്‍ശനം നല്‍കുക. 
• 10 വയസിനും 60 വയസിനും ഇടയിൽ പ്രായമുളളവർക്കാണ് ദർശനത്തിന് അനുവാദം.
• വെര്‍ച്വല്‍ ക്യൂ ബുക്കിങ്ങില്‍ സന്നിധാനത്ത് എത്തേണ്ട സമയവും തീയതിയും ഓരോരുത്തർക്കും നൽകും. ഈ സമയം പാലിച്ചായിരിക്കും ദർശനം.   
• ദര്‍ശനത്തിന് എത്തുന്നതിന് തൊട്ടുമുന്‍പുള്ള 48 മണിക്കൂറിനകം ലഭിച്ച കൊവിഡ് നെഗറ്റീവ് സര്‍ട്ടിഫിക്കറ്റാണ് ഹാജരാക്കേണ്ടത്.           
• കൊവി‍ഡ് മാനദണ്ഡങ്ങൾ പാലിച്ചായിരിക്കണം ദർശനം. സാനിറ്റൈസൻ, മാസ്ക്, കയ്യുറകൾ എന്നിവ ഉപയോ​ഗിക്കണം.
• മലകയറുമ്പോള്‍ മാസ്‌ക് ധരിക്കുന്നത് ബുദ്ധിമുട്ടാണേൽ ആവശ്യമെങ്കില്‍ മാസ്‌ക് ഒഴിവാക്കാം. ബാക്കി എല്ലാ സമയങ്ങളിലും മാസ്‌ക് നിർബന്ധമായും ധരിക്കണം. 
• ഭക്തര്‍ നിശ്ചിത അകലത്തിൽ മാത്രമേ ദർശനത്തിന് എത്താവൂ. കൂട്ടം ചേര്‍ന്ന് സഞ്ചരിക്കാന്‍ പാടില്ല.
• പമ്പ-ത്രിവേണിയിൽ മുങ്ങിക്കുളിക്കാൻ ആരെയും അനുവദിക്കില്ല. കുളിക്കാനായി പ്രത്യേകം ഷവറുകൾ തയ്യാറാക്കിയിട്ടുണ്ട്. 
• വടശ്ശേരിക്കര, എരുമേലി എന്നീ വഴികളിലൂടെ മാത്രമാണ് ശബരിമലയിലേക്കുളള പ്രവേശനം.ബാക്കി എല്ലാ വഴികളും അടച്ചു.
• നിലയ്‌ക്കലിലും പമ്പയിലും സന്നിധാനത്തും വിരിവയ്‌ക്കൽ സൗകര്യം ഉണ്ടായിരിക്കില്ല. 
• പമ്പയിൽ തിരക്ക് ഒഴിവാക്കുന്നതിന് കെട്ടുനിറ ഒഴിവാക്കണം.
• ഹോട്ടലുകളിലും അന്നദാന കൗണ്ടറുകളിലേയും ജീവനക്കാർക്ക് കൊവിഡ് നെഗറ്റീവ് സർട്ടിഫിക്കറ്റ് നിർബന്ധം. 
• പതിനെട്ടാം പടിയിലും സന്നിധാനത്തും ഭക്തർക്ക് സാമൂഹിക അകലം കർശനമാക്കും.
• ഒരു എസ്‌പിയുടെ നേതൃത്വത്തിലുള്ള പൊലീസ് സംഘമാണ് സന്നിധാനത്ത് ക്യാംപ് ചെയ്യുക.
• നിലക്കൽ, പമ്പ എന്നിവിടങ്ങളിൽ പാരാമെഡിക്കൽ സ്റ്റാഫുകൾ സഹിതം ആശുപത്രികൾ ഒരുക്കി.