മൂന്നാം ടെസ്റ്റിൽ രോഹിതിന്റെ തിരിച്ചുവരവുണ്ടാകുമോ?

ബോക്‌സിങ് ഡേ ടെസ്റ്റില്‍ എട്ട് വിക്കറ്റിന്റെ തകര്‍പ്പന്‍ ജയമാണ് ഇന്ത്യ ആസ്ട്രേലിയക്കെതിരെ സ്വന്തമാക്കിയത്.  മൂന്നാം മത്സരത്തില്‍ സൂപ്പർ താരം രോഹിത് ശര്‍മ ടീമിലേക്കെത്തുമോ ഇല്ലയോ എന്നറിയാനുള്ള ആകാംക്ഷയിലാണ് ഇപ്പോള്‍ ആരാധകർ. 

ഐപിഎല്ലിനിടെ പരിക്കേറ്റ രോഹിതിനെ പരിമിത ഓവര്‍ പരമ്പരയില്‍ ഉള്‍പ്പെടുത്തിയിരുന്നില്ല. എന്നാല്‍ വിരാട് കോഹ്ലി ആദ്യ ടെസ്റ്റിന് ശേഷം നാട്ടിലേക്ക് മടങ്ങിയതോടെയാണ് രോഹിതിനെ ടീമിലേക്ക് എത്തിച്ചത്. നാഷണല്‍ ക്രിക്കറ്റ് അക്കാദമിയില്‍ നിരീക്ഷണത്തിലായിരുന്ന രോഹിത് അവിടെ ഫിറ്റ്‌നസ് തെളിയിച്ചതോടെയാണ് ആസ്‌ട്രേലിയയിലേക്ക് പറന്നത്. ‌രോഹിതിന്റെ മടങ്ങിവരവിനെക്കുറിച്ച് നായകന്‍ അജിന്‍ക്യ രഹാനെയും പ്രതികരിച്ചിരുന്നു. 'രോഹിതിന്റെ തിരിച്ചുവരവില്‍ ടീമിലെ എല്ലാവരും സന്തോഷത്തിലാണ്. അവനോട് സംസാരിച്ചിരുന്നു. ടീമിലേക്ക് തിരിച്ചെത്താന്‍ കാത്തിരിക്കുകയാണവന്‍ എന്നായിരുന്നു രഹാനെയുടെ അഭിപ്രായം.

ഇപ്പോഴിതാ രോഹിത് ശര്‍മ കളിക്കുന്നത് സംബന്ധിച്ച് നിര്‍ണ്ണായക വെളിപ്പെടുത്തല്‍ നടത്തിയിരിക്കുകയാണ് ഇന്ത്യന്‍ പരിശീലകന്‍ രവി ശാസ്ത്രി. 'രോഹിത് ശര്‍മ ബുധനാഴ്ച ടീമിനൊപ്പം ചേരും. ശാരീരികമായി എന്താണ് അവന്റെ അവസ്ഥയെന്ന് പരിശോധിക്കും. നീണ്ടകാല ക്വാറന്റെയ്‌ന് ശേഷമാണ് അവന്‍ വരുന്നത്. ടീമിലേക്ക് ഉള്‍പ്പെടുത്തുന്നതിന് മുമ്പ് വിശദമായ പരിശോധന നടത്തും'-രവി ശാസ്ത്രി പറയുന്നു. 

മോശം ഫോമിലുള്ള മായങ്ക് അഗര്‍വാളിനെ ഓപ്പണിങ്ങില്‍ നിന്ന് മാറ്റിയാവും രോഹിത് ശര്‍മയെ പരിഗണിക്കുക. ശുഭ്മാന്‍ ഗില്‍ ആദ്യ മത്സരത്തില്‍ത്തന്നെ തിളങ്ങിയതിനാല്‍ യുവതാരത്തിന് സ്ഥാനം നഷ്ടപ്പെടാന്‍ സാധ്യത കുറവാണ്. ഹനുമ വിഹാരിക്ക് പകരം മധ്യനിരയില്‍ കെ എല്‍ രാഹുലും എത്താന്‍ സാധ്യതയുണ്ട്. പരിക്കേറ്റ ഉമേഷ് യാദവിനു പകരം പുതിയ പേസർ നടരാജൻ ടീമിലെത്താനും ഇടയുണ്ട്.