മനോരമ ഒരു ഇംഗ്ലീഷ് വാരിക തുടങ്ങാന്‍ തീരുമാനിച്ചപ്പോള്‍ 'The Week'ന് ആ പേര് നിര്‍ദ്ദേശിച്ചത് ടി വി ആര്‍ ഷേണായി ആയിരുന്നു. ചെറുതും സുന്ദരവും വിശാലമായ അര്‍ത്ഥമുള്ളതും ആര്‍ക്കും കേട്ടാല്‍ മനസിലാകുന്നതുമായ ഒരു പേര് തേടി മനോരമ നേതൃത്വം തലപുകച്ചപ്പോള്‍ അന്ന് ഡല്‍ഹി ബ്യൂറോ ചീഫ് ആയിരുന്ന ഷേണായിക്ക് 'The Week' എന്ന പേര് കണ്ടെത്താന്‍ അധികം സമയമൊന്നും വേണ്ടിവന്നില്ല.
വീക്കിന്റെ ആദ്യത്തെ എഡിറ്റര്‍ അന്ന് 45 കാരനായിരുന്ന വി കെ ഭാര്‍ഗവന്‍നായര്‍ ആയിരുന്നെങ്കിലും ടി വി ആര്‍ ഷേണായിക്ക് നിര്‍ണായകമായ പങ്കുണ്ടായിരുന്നു. ഭാര്‍ഗവന്റെ മരണത്തിനു ശേഷം ടി വി ആര്‍ ഷേണായി എഡിറ്ററുമായി. ഇപ്പോള്‍ ഇതൊക്കെ എഴുതാന്‍ കാരണം മഹാനായ ആ പത്രപ്രവര്‍ത്തകന്‍ മണ്‍മറഞ്ഞിട്ട് രണ്ടു സംവത്സരം തികഞ്ഞു ഈ ഏപ്രിലില്‍. കൊറോണ വൈറസ് ലോകമെമ്പാടുമുള്ള വിശേഷങ്ങളേയും വാര്‍ത്തകളേയും അപ്പാടെ കിഴ്പ്പെടുത്തി താണ്ഡവമാടാന്‍ തുടങ്ങിയതോടെ എല്ലാം വിസ്മൃതിയിലായോ എന്തോ..!
ഷേണായി എഴുതിയിരുന്ന വാര്‍ത്താകോളങ്ങള്‍ വളരെയേറ ശ്രദ്ധിക്കപ്പെട്ടിരുന്നു. എഴുതിയിരുന്നു എന്ന് പറഞ്ഞത് മരണം വരെ പേനകൊണ്ട് എഴുതുന്ന ശീലമായിരുന്നു അദ്ദേഹത്തിന്, അതും ഇംഗ്ലീഷില്‍ മാത്രം..! ഒരിക്കലും ടൈപ്പ് റൈറ്റര്‍ ഉപയോഗിച്ചിരുന്നില്ല. കമ്പ്യൂട്ടറും ലാപ്‌ ടോപ്പുമൊക്കെ വന്നിട്ടും ഷേണായി ആ വഴിക്ക് നീങ്ങാന്‍ കൂട്ടാക്കാതെ വാളിനേക്കാള്‍ ശക്തിയുള്ളതാണ് പേന എന്ന് വിശ്വസിച്ചുപോന്നു. ഒരുപക്ഷേ, കേരളത്തില്‍ ഏറ്റവും കൂടുതല്‍ വായനക്കാരുള്ള കോളമെഴുത്തുകാരന്‍ അദ്ദേഹമായിരുന്നു. ഒരു പ്രത്യേക ശൈലിയും ഒട്ടേറെ വിവരങ്ങളുമുള്ള എഴുത്തായിരുന്നു അദ്ദേഹത്തിന്റെ കോളങ്ങള്‍ക്ക് ഇത്രയേറെ ജനപ്രീതി ലഭിക്കാന്‍ കാരണം. അവസാന കാലത്ത് മാതൃഭൂമിയിലായിരുന്നു അദ്ദേഹം പതിവായി എഴുതിയിരുന്നത്. ഇന്ത്യന്‍ എക്സ്പ്രസ്, ഖലീജ് ടൈംസ്, ന്യൂസ് ടൈം, റീഡിഫ്.കോം തുടങ്ങിയ ഒട്ടേറെ പ്രസിദ്ധീകരണങ്ങളിലും അദ്ദേഹം എഴുതിയിരുന്നു.
എറണാകുളം ജില്ലയിലെ ചെറായിയില്‍ തളിയാടിപ്പറമ്പില്‍ വിട്ടപ്പ രാമചന്ദ്ര ഷേണായി. ബാബു എന്നായിരുന്നു വീട്ടിലെ വിളിപ്പേര്. ചെറായിയിലെ രാമവര്‍മ സ്‌ക്കൂളിലും മഹാരാജാസ് കോളേജിലും പഠനം പൂര്‍ത്തിയാക്കിയ ശേഷം മൂംബൈയില്‍ എത്തിയാണ് പത്രപ്രവര്‍ത്തനരംഗത്തേക്ക് കടക്കുന്നത്. അവിടെ സ്വാമിനാഥന്‍ സദാനന്ദ് സ്ഥാപിച്ച ഫ്രീ പ്രസ് ജേണലില്‍ ആദ്യ അവസരം കിട്ടി. ഇന്ത്യന്‍ എക്സ്പ്രസിന് അന്നുണ്ടായിരുന്ന സണ്‍ഡേ സ്റ്റാന്‍ഡേഡില്‍ പത്രലോകത്തെ കുപതിയായ ഫ്രാങ്ക് മൊറൈസിന്റെ കളരിയിലാണ് ഷേണായി പയറ്റിത്തെളിഞ്ഞത്. ടൈംസ് ഓഫ് ഇന്ത്യയുടെ ആദ്യത്തെ ഇന്ത്യന്‍ പത്രാധിപരായിരുന്നു ഫ്രാങ്ക് മൊറൈസ്. പിന്നീടാണ് ഇന്ത്യന്‍ എക്സ്പ്രസില്‍ എത്തിയത്.
1970 ലെ ബാങ്കു ദേശവല്‍ക്കരണം. പ്രധാനമന്ത്രി ഇന്ദിരാഗാന്ധിയുടെ അതിധീരവും അതിലേറെ സാഹസികവുമായ ഒരു നിര്‍ണ്ണായക നടപടിയായിരുന്നുവല്ലൊ ബാങ്ക് ദേശവല്‍ക്കരണം. മുന്‍കൂട്ടി ഒരു നേരിയ സൂചനയെങ്കിലും പുറത്തറിഞ്ഞാല്‍ എല്ലാം കളത്തിലിറങ്ങും എന്നറിയാവുന്ന ഇന്ദിരാഗാന്ധി അതീവരഹസ്യമായാണ് കരുക്കള്‍ നീക്കിയത്. ദേശവല്‍ക്കരണത്തിന്റെ പ്രഖ്യാപനം വരുന്നതിനുമുമ്പ്, ഇന്ത്യയുടെ സമ്പദ് വ്യവസ്ഥയെ സമൂലം നിയന്ത്രിയ്ക്കുന്ന ഒരു സുപ്രധാന പ്രഖ്യാപനം വരാന്‍ പോകുന്നു എന്ന് ഷേണായി പ്രവചിച്ചിരുന്നു. ബാങ്ക് ദേശസാല്‍ക്കരണം എന്ന വാക്കുകള്‍ ഉപയോഗിച്ചിരുന്നില്ലെന്നു മാത്രം. പ്രഖ്യാപനം വന്ന ദിവസം, ഇന്ദിരയുടെ ഈ ധീരമായ നടപടിയുടെ ഉല്‍പ്പത്തി മുതല്‍ക്കുള്ള എല്ലാ പ്രേരണകളേയും സമഗ്രമായി വിലയിരുത്തിക്കൊണ്ട് ഷേണായി അത് വാര്‍ത്തയാവുകയും ചെയ്തു.
'റായ്ബറേലിയില്‍നിന്ന് ഇന്ദിരാഗാന്ധി തെരഞ്ഞെടുക്കപ്പെട്ടത് അസാധുവാക്കണമെന്നു കാട്ടി രാജ്നാരായണന് കേസ് ഫയല്‍ ചെയ്തു 1975 ജൂണ്‍ 12ന് ജസ്റ്റിസ് ജഗ്മോഹന്‍ലാല്‍ വിധിന്യായത്തിലൂടെ രാജ്നാരായണന് അനുകൂലമായ വിധി പുറപ്പെടുവിക്കുകയും അടുത്ത ആറുവര്‍ഷത്തേക്കു തെരഞ്ഞെടുപ്പില്‍ മത്സരിക്കുന്നതില്‍നിന്നും ഇന്ദിരാഗാന്ധിയെ വിലക്കുകയും ചെയ്തു. ഇതോടെ ഇന്ദിരാഗാന്ധിയുടെ രാജി ആവശ്യപ്പെട്ട് രാജ്യത്തെങ്ങും പ്രതിപക്ഷം പ്രതിഷേധമാരംഭിച്ചു. ഈ പ്രതിഷേധപ്രകടനങ്ങള്‍ രാജ്യസുരക്ഷയ്ക്ക് ആപത്താണെന്ന കാരണം കാട്ടിയാണ് അന്നത്തെ പ്രസിഡന്റ് ഫക്രുദീന്‍ അലി അഹമ്മദ് രാജ്യത്ത് അടിയന്തിരാവസ്ഥ പ്രഖ്യാപിച്ചത്. അടിയന്തിരാവസ്ഥ വാര്‍ത്തയായി വരും മുമ്പും ഷേണായി സംഗതി മണത്തറിഞ്ഞിരുന്നു..!
1990ല്‍ ഷേണായി മനോരമ വിട്ടു. പിന്നീട് സണ്‍ഡേ മെയില്‍ എന്ന സണ്‍ഡേ ന്യൂസ് പേപ്പറിന്റെ ചീഫ് എഡിറ്ററായി. തുടര്‍ന്ന് സ്വതന്ത്ര പത്രപ്രവര്‍ത്തനത്തിലേക്കു തിരിഞ്ഞ ഷേണായിയുടെ പംക്തി ബിറ്റ് വീന്‍ യു ആന്‍ഡ് മീ ഏറെ ജനശ്രദ്ധ പിടിച്ചുപറ്റിയതായിരുന്നു. 2003ല്‍ രാജ്യം അദ്ദേഹത്തെ പത്മഭൂഷണ്‍ നല്‍കി ആദരിച്ചു. മൊറോക്കോ ഭരണാധികാരിയുടെ ഉന്നത പുരസ്‌കാരമായ അലാവിറ്റ കമാന്‍ഡര്‍ വിസ്ഡം പുരസ്‌കാരവും ലഭിച്ചിട്ടുണ്ട്. പ്രസാര്‍ ഭാരതി നിര്‍വാഹണ സമിതിയംഗമായിരുന്നു.
ഇനിയാർക്ക് വേണം ലേണിംഗ് ആപ്പ്? ഇനി പഠിക്കാം ഈസിയായി! ഔട്ട്‍ക്ളാസിൽ!