ഇതിനിടയിലും വിവാദങ്ങളിലെ പ്രധാനകണ്ണികളായ രോഹിത്തും വിരാടും മൗനം അവലംബിക്കുകയായിരുന്നു. കൂടാതെ വിന്‍ഡീസ് പര്യടനത്തിനു മുമ്പുള്ള പത്രസമ്മേളനം കോഹ്ലി ബഹിഷ്‌ക്കരിച്ചേക്കുമെന്ന വാര്‍ത്തകളും പ്രചരിച്ചതോടെ വിവാദങ്ങളില്‍ കഴമ്പുണ്ടെന്ന തോന്നലുകളും കായികപ്രേമികളില്‍ സജീവമായി. ഇതിനൊപ്പം പുതിയ കോച്ചിനെ തേടിയുള്ള ബി സി സി ഐ അപേക്ഷയില്‍ രോഹിത് ക്യാപ്റ്റനായ മുംബൈ ഇന്ത്യന്‍സിന്റെ നിലവിലെ കോച്ച് മുന്‍ ശ്രീലങ്കന്‍ താരം മഹേള ജയവര്‍ധനെ കൂടി അപേക്ഷിച്ചതോടെ ചേരിപ്പോര് മുറുകി. തന്റെ ക്യാപ്റ്റന്‍സിക്ക് കോട്ടം തട്ടുമെന്നതിനാല്‍ എന്ത് വില കൊടുത്തും കോഹ്ലി ജയവര്‍ധനെ കോച്ചാവുന്നത് തടയുമെന്നായിരുന്നു പ്രചരിച്ച വാര്‍ത്തകള്‍. ഇതിനിടെ ഇന്‍സ്റ്റാഗ്രാമില്‍ കോഹ്ലിയേയും ഭാര്യ അനുഷ്‌ക ശര്‍മയേയും രോഹിത് ശര്‍മ അണ്‍ഫോളോ ചെയ്തതും വാര്‍ത്തയായിരുന്നു.
''കളിക്കാരുടെ സ്വകാര്യകാര്യങ്ങള്‍ ചര്‍ച്ചാവിഷയമാക്കുന്നത് ഒട്ടും ശരിയല്ല. പലരും പല നുണകളാണ് കഴിഞ്ഞ ദിവസങ്ങളിലായി പടച്ചുവിടുന്നത്. കഴിഞ്ഞ 11 വര്‍ഷമായി ഞാന്‍ ക്രിക്കറ്റ് കളിക്കുന്നു. രോഹിത് 10 വര്‍ഷമായി അന്താരാഷ്ട്രക്രിക്കറ്റിലുണ്ട്. ടെസ്റ്റില്‍ നമ്പര്‍ 7 ല്‍ നിന്ന് ഒന്നാം സ്ഥാനത്തെത്തി നമ്മള്‍. ടെസ്റ്റിലും ടി 20 യിലും സ്ഥിരതയാര്‍ന്ന പ്രകടനം നടത്തി. ടീമില്‍ കളിക്കാര്‍ തമ്മില്‍ പരസ്പര ബഹുമാനമില്ലെങ്കില്‍ എങ്ങനെയാണ് ഇതിനു സാധിക്കുക?'' കോഹ്ലി പത്രസമ്മേളനത്തില്‍ ചോദിച്ചു. ഇതിനൊപ്പം സപ്പോര്‍ട്ടുമായി കോച്ച് രവി ശാസ്ത്രിയും രംഗത്തെത്തിയിട്ടുണ്ട്. ടീമില്‍ ഒരു പ്രശ്‌നവുമില്ലെന്നും ഒരു താരവും ടീമിനേക്കാള്‍ വലുതല്ലെന്നുമായിരുന്നു ശാസ്ത്രിയുടെ പരാമര്‍ശം.
പത്രസമ്മേളനത്തില്‍ പ്രശ്‌നങ്ങളൊന്നുമില്ലെന്ന് പറഞ്ഞെങ്കിലും കോഹ്ലി പറഞ്ഞ ചില കണക്കുകള്‍ സ്വയം സീനിയറാവാനുള്ള കോഹ്ലിയുടെ ശ്രമമാണെന്ന തരത്തിലുള്ള വാര്‍ത്തകളും രംഗത്തുണ്ട്. അന്താരാഷ്ട്രക്രിക്കറ്റില്‍ കോഹ്ലിയെക്കാള്‍ സീനിയറാണ് രോഹിത് ശര്‍മ എന്നത് തന്നെയാണ് കാര്യം. കോഹ്ലി പത്രസമ്മേളനത്തില്‍ 11 വര്‍ഷം അന്താരാഷ്ട്രക്രിക്കറ്റില്‍ താനുണ്ടെന്നും രോഹിത് 10 വര്‍ഷമായി ഉണ്ടെന്നുമാണ് പറഞ്ഞിരുന്നത്. എന്നാല്‍ 2007 ടി 20 ലോകകപ്പില്‍ ഇന്ത്യന്‍ വിജയങ്ങളില്‍ നിര്‍ണായകപങ്ക് വഹിച്ച താരമാണ് രോഹിത്. വിരാട് അരങ്ങേറ്റം കുറിക്കുന്നതച് 2008 ആഗസ്ത് 18 ന് ശ്രീലങ്കയ്‌ക്കെതിരെയുള്ള ഏകദിനത്തിലാണെങ്കില്‍, രോഹിത് അതിനും മുമ്പ് 2007 ജൂണ്‍ 23 ന് അയര്‍ലാന്‍ഡിനെതിരെയുള്ള ഏകദിനമത്സരങ്ങളില്‍ അരങ്ങേറ്റം കുറിച്ച താരമാണ്. അങ്ങനെ നോക്കുമ്പോള്‍, കോഹ്ലിയെക്കാള്‍ ഒരു വര്‍ഷം സീനിയറാണ് രോഹിത്.